Albert til­nefndur sem leik­maður mánaðarins: Hægt að kjósa hann

Albert skoraði tvö mörk í janúar, eitt á móti Bologna og annað á móti Salernitana. Hann var millimetrum frá því að skora einnig á móti Lecce en þá var fylgt eftir á marklínunni eftir sláarskot hans úr aukaspyrnu.

Albert er allt í öllu í sóknarleik Genoa sem tapaði ekki leik í janúar, vann tvo leiki og gerði tvö jafntefli.

Albert spilaði alls í 360 mínútur í mánuðinum, 81 prósent sendinga hans heppnuðust og hann bjó til níu marktækifæri fyrir liðsfélaga sína.

Albert er tilnefndur ásamt fimm öðrum en þeir eru Lautaro Martínez (framherji Inter), Dusan Vlahovic (framherji Juventus), Ruben Loftus-Cheek (miðjumaður AC Milan), Szymon Zurkowski (miðjumaður Empoli) og Alessandro Buongiorno (miðvörður Torino).

Hingað til hafa Rafael Leao, AC Milan (September), Paulo Dybala, Roma (Nóvember) og Christian Pulisic, AC Milan (desember) verið kosnir bestu leikmenn mánaðrins í Seríu A á 2023-24 tímabilinu.

Það er hægt að hjálpa Alberti að hreppa þessi verðlaun með því að kjósa hann hér.