Ung­lingum vísað af veitinga­stað og maður með vesen á slysa­deild

Aðstoðar lögreglu var óskað við að vísa hóp unglinga út af veitingastað í póstnúmerinu 108 og þá barst beiðni um aðstoð frá slysadeild Landspítalans vegna einstaklings sem lét ófriðlega.

Tilkynnt var um innbrot og þjófnað í heimahúsi í Kópavogi og um líkamsárás í póstnúmerinu 111. Einn var fluttur á slysadeild til aðhlynningar.

Lögregla hafði einnig afskipti af ökumanni sem ók á 150 km/klst og sinnti ekki stöðvunarmerkjum. Ók viðkomandi bifreið sinni að lokum yfir umferðareyju, með þeim afleiðingum að bíllinn var óökufær.

Ökumaðurinn er grunaður um akstur undir áhrifum og var vistaður í fangageymslu lögreglu, þar sem hann verður þar til hægt verður að ræða við hann.

Ein tilkynning barst um umferðarslys, í póstnúmerinu 110. Þar urðu minniháttar meiðsl, samkvæmt lögreglu. Var einn ökumaður vistaður í fangageymslu. Er hann grunaður um akstur undir áhrifum.