Hrósar Oliver fyrir að brotna ekki og dæma ekki víti á City

Liverpool-menn voru afar ósáttir að fá ekki víti en þrátt fyrir að Doku hafi sparkað í bringuna á Mac Allister dæmdi Oliver ekki neitt. Myndbandsdómarinn var á sömu skoðun.

Walker var aftur á móti einkar sáttur með Oliver og í viðtali á Sky Sports hrósaði hann honum fyrir að standast pressuna og dæma ekki víti.

„Mér fannst dómarinn gera mjög vel. Hann hefði getað brotnað með fólkið á Anfield á bakinu en þetta sýnir reynslu hans og karakter,“ sagði Walker.

„Þess vegna er hann talinn einn af bestu dómurum Englands og bestu dómurum heims í augnablikinu.“

Walker steig svo varlega til jarðar er hann var spurður hvort Doku hefði átt að fá á sig víti þegar hann sparkaði í Mac Allister.

„Það er ekki mitt að segja. Ef ég segi að þetta hafi ekki verið víti verður það að fyrirsögn. Ef ég segi að þetta hafi verið víti verður það að fyrirsögn,“ sagði Walker.

City er í 3. sæti ensku úrvalsdeildarinnar með 63 stig, einu stigi á eftir Arsenal og Liverpool þegar tíu leikir eru eftir af tímabilinu.