„Ég kynntist ástinni í lífi mínu þarna“

Hér má sjá viðtalið við Ástrós í heild sinni:

Var bókstaflega draumaprinsinn

Ástrós er í sambúð með Adam Helgasyni og saman eiga þau dóttur sína Nóru Náð. Ástin spyr ekki alltaf um rétta tímann.

„Ég var á þeim stað í lífinu að ég var búin að eiga ákveðin sambönd og í ákveðnum samskiptum í mínu lífi á þessum tíma sem ýttu mér út í mikla sjálfsvinnu. Þetta var eitt af þessum stóru og erfiðu hlutum sem ég hef gengið í gegnum í lífinu. 

Þannig að ég er á þessum tíma í algjörri sjálfsvinnu, þrisvar í mánuði hjá sálfræðingi, er að læra á alla triggerana mína og læra á sjálfa mig. Ég var svona eiginlega komin á þann stað að ég var svo sátt við sjálfa mig eftir að hafa gengið í gegnum erfiða lífsreynslu og ég kynnist honum.“

Ástrós segist í fyrstu hafa verið harðákveðin í að hún ætti ekki að fara strax í samband.

„Ég hugsaði bara að vera ein núna er það besta sem ég veit, ekki séns að það breytist. Þú þarft bókstaflega að vera draumaprinsinn til að ég breyti því, sem hann svo var,“ segir Ástrós og brosir út að eyrum.

Vináttan það allra besta

„Þannig að ég bara gaf mig og við byrjuðum saman frekar fljótt, þetta fór fljótt af stað og ég bara kynntist ástinni í lífi mínu þarna. Ég er mjög ánægð að ég hafi leyft þrjóskunni í mér að fara til hliðar því við eigum núna líka litlu skvísuna okkar í dag. Þetta var mjög góð ákvörðun,“ segir Ástrós og hlær.

Hún segir að vináttan sé algjör lykill í þeirra sambandi.

„Það besta við Adam er að hann er besti vinur minn. Það hefur haldið okkur gangandi í gegnum fyrsta árið með barn, það reynir rosalega mikið á samband. Það er ekki mikill neisti þá, maður er í þessu verkefni, þreyttur, segir alls konar en lykilatriðið er að við erum bestu vinir og þetta verður allt í lagi. 

Við erum á því tímabili núna og það er bara yndislegt, að hafa einhvern sem bakkar mig alltaf upp og styður mig í gegnum allt sem mig langar að gera. Það er ómetanlegt.“

Ræða opinskátt um fjölbreyttar hliðar móðurhlutverksins

Ástrós stofnaði hlaðvarp samhliða móðurhlutverkinu sem heitir Mömmulífið, ásamt Guðrúnu Sørtveit. Þær kynntust í stuttri vinnuferð erlendis, eiga börn á sama aldri og urðu samstundis góðar vinkonur.

„Það er mikið til að tala um þegar það kemur að mömmulífinu. Það er líka gaman að finna fyrir því hvað aðrar mæður hafa þörf fyrir að heyra það sem enginn er að segja. 

Við höfum meðal annars rætt líkamsímyndina og samböndin eftir barnseignir sem er til dæmis eitthvað sem eg heyrði ekkert um, því auðvitað reynir þetta mikið á sambandið og það er svo gott að ræða þetta opinskátt. 

Þetta eru ýmsar tilfinningar sem fólk er almennt ekki að tala um en við nálgumst í hlaðvarpinu. Það eru ótrúlega margir sem tengja og því mikilvægt að tala um þessi málefni sem áður fyrr var kannski svolítið verið að dansa í kringum.“

Ómetanlegt að geta hjálpað með sinni sögu

Í hlaðvarpinu hefur Ástrós meðal annars rætt um átröskun sem hún glímdi við á yngri árum. Henni finnst mikilvægt að geta rætt hlutina opinskátt og þykir vænt um að geta hjálpað öðrum með sinni sögu.

„Bara það að þetta hjálpi einni manneskju er bara meira en nóg fyrir mig. Mér finnst líka svo mikilvægt að tala um það hvert ég er komin í dag. Þetta er sjúkdómur en það sem er svo mikil blessun er að þetta er læknanlegur sjúkdómur. 

Það er hægt að laga þetta, það er hægt að vinna í þessu og vinna líka í sjálfsmildi. Það er eitthvað sem hjálpaði mér mjög mikið, því það tengist sjúkdómnum mjög sterkt. Sömuleiðis að fara í þerapíu og gera allt sem þú þarft, lesa allar bækur sem manni dettur í hug.“

Hún segir sömuleiðis mikilvægt að kanna hvað virkar fyrir sig og hvað ekki. Sumt sem hjálpar einhverjum getur verið triggerandi fyrir aðra.

„Stundum finn ég að eitthvað getur verið triggerandi og þá veit ég að ég þarf ekki að sjá eða lesa það, þó að það hafi einhvern tíma virkað vel fyrir mig. 

Ef ég ætti að gefa ráð þá væri það líka að velja vel hverju þú ert að fylgja og hvað þú ert að skoða, forðast allt sem hjálpar ekki. Ef þú finnur að eitthvað er að triggera þig á samfélagsmiðlum til dæmis þá er alltaf hægt að ýta á unfollow takkann.“

Byrjaði aftur að dansa í Allir geta dansað

Ástrós hefur komið víða að í dansheiminum og sló meðal annars í gegn í sjónvarpsþáttunum Allir geta dansað, sem hún segir að hafi verið frábær lífsreynsla. Hún flutti erlendis 16 ára gömul í atvinnumennskuna og varð Frakklandsmeistari í samkvæmisdansi 17 ára. Nokkrum árum síðar lenti Ástrós á spítala vegna næringarskorts eftir að hafa verið veik af átröskun. 

„Ég var rosalega ung þegar að ég fór út. Það hefur sterk áhrif. Ég fór ein og þegar ég hugsa þetta í dag þá finnst mér 16 ára náttúrulega bara vera barn. Þar var ég líka með mjög strangan þjálfara, orðaforðinn og kúltúrinn var öðruvísi. Þetta hefur allt saman haft alls konar áhrif, bæði góð og slæm.“

Aðspurð hvort hún eigi í flóknu sambandi við dansinn eftir átröskunina segir Ástrós:

„Keppnisheimurinn var það sem ég átti erfitt með, þessi samanburður, það var alltaf þessi samanburður. Ég sem sagt hætti í dansi þegar ég var í Frakklandi og fór inn á Hvítabandið hér heima. Ég dansaði ekki í nokkur ár fyrr en ég fékk símtal um að Stöð 2 ætlaði að gera Allir geta dansað.

Ég elska að vera í sjónvarpi, finnst ekki leiðinlegt að vera fyrir framan myndavélina og þetta var vissulega keppni en samt aðallega gaman. Verkefni mitt í þessu var bókstaflega að skapa, það er eitthvað sem ég elska við dansinn. Dansinn gaf mér líka rosalega margt. 

Ég tala til dæmis fimm tungumál eftir að hafa verið búsett erlendis. Ég hætti í skóla fyrir dansinn og mamma sagði að ég yrði þá að fara á tungumálanámskeið samhliða því, sem ég gerði.

Ég á mjög gott samband við dans í dag. Ég kenni dans og ég get ekki sleppt takinu á þessu. Ég held að það fylgi mér út ævina, ég yrði eiginlega bara sár ef ég væri ekki enn að dansa um sjötugt.“

Gott að kveðja fortíðar Ástrós

Ástrós segir að innlögnin á Hvítabandið hafi verið öflugt upphaf af átröskunarbataferlinu og líkir lífsreynslunni svolítið við skóla, þar sem hún þurfti að vera í prógrammi frá átta til fjögur. Hins vegar sé margt sem megi betur fara og umræðan skipti sömuleiðis miklu máli en hún segir sjúkdóminn algengari en fólk geri sér grein fyrir. Þá sé erfitt fyrir marga að útskrifast og fá ekki mikla eftirfylgni.

„Ég var mjög heppin að vera í þannig aðstæðum að ég fékk tíma þar sem ég þurfti ekki að vinna og þurfti ekki að gera neitt nema að vinna í sjálfri mér. Ég fékk rosalega góðan stuðning og ég held að það hafi svolítið bjargað mér. Ég er rosalega langt frá átröskun í dag. Það er skrýtið að hugsa til þess að mér finnst þessi Ástrós bara önnur manneskja.

Ég tengi rosa lítið við hana í dag, ég skil hana og er rosalega stolt af henni. En ég er rosa ánægð að ég skildi hana eftir. 

Það er svo margt sem fylgir þessum sjúkdómi sem fólk áttar sig ekki á. Þunglyndi og kvíði sem dæmi og það var mikið þunglyndi hjá mér á þessum tíma. En þetta er svo rosalega langt frá mér í dag. Ég er svo þakklát fyrir það.“

Í viðtalinu er fjallað um átröskun. Hér má lesa nánar um átröskun og úrræði sem eru í boði. Hér má kynna sér hagsmunasamtökin SÁTT . Bráðageðdeild er í síma 5431000.