Full vél af fólki ætlar að koma Ís­landi á EM

Miðar í ferðina voru settir í sölu á föstudaginn, eftir að Ísland sló Ísrael út með 4-1 sigri á fimmtudagskvöld.

Ljóst var að ferðin yrði ekki farin nema að lágmarksfjöldi bókaði sér sæti fyrir miðnætti í gærkvöld. Nú segir á vef Icelandair að uppselt sé í ferðina, og fara því að lágmarki 160 manns á leikinn samkvæmt svari við fyrirspurn Vísis. Áhugasamir geta þó enn skráð sig á biðlista og mögulegt að sætum verði fjölgað með því að nota stærri flugvél.

Áhugasamir geta sömuleiðis ferðast á eigin vegum til Wroclaw, og keypt sér miða á leikinn í gegnum Tix.is en miðaverð er aðeins 3.000 krónur. Ljóst er að einhverjir fara þá leið og á vef KSÍ segir að von sé á hundruðum Íslendinga á leikinn sem skera mun úr um það hvort Ísland komist á EM í Þýskalandi í sumar.

Dráttur réði því hvort að Ísland eða Úkraína yrði á heimavelli í þessum úrslitaleik og höfðu Úkraínumenn heppnina með sér. Vegna stríðsins í Úkraínu fer leikurinn hins vegar fram í Póllandi, á Wroclaw-leikvanginum sem tekur tæplega 43 þúsund manns í sæti.

Þess má geta að leikvangurinn var heimavöllur Daníels Leós Grétarssonar, varnarmanns Íslands, í rúmt ár þegar hann spilaði með Slask Wroclaw í pólsku úrvalsdeildinni, áður en hann flutti til Danmerkur í fyrrasumar.

Íslenski landsliðshópurinn ferðast til Wroclaw frá Búdapest í dag en Úkraínumenn komu til Póllands strax á föstudagsmorgun, eftir torsóttan 2-1 sigur sinn gegn Bosníu í Sarajevo.

Leikur Úkraínu og Íslands verður sýndur í opinni dagskrá á Stöð 2 Sport þriðjudaginn 26. mars. Leikurinn hefst klukkan 19.45 en upphitun fyrir leikinn hefst klukkan 19.10.