Ekki gefið hvernig spilast úr stöðunni fari Katrín fram

Það bíða margir eftir því að Katrín Jakobsdóttir forsætisráðherra og formaður Vinstri grænna geri upp við sig hvort hún bjóði sig fram til embættis forseta Íslands. Hún segist ekki hafa leitt hugann að þessu framan af ári. Hún hafi hins vegar gert það á undanförnum vikum eftir að fólk hafi komið að máli við hana.

Alþingi kemur saman á mánudag eftir páskaleyfi og fjölmörg mál bíða afgreiðslu á því sem eftirl lifir vorþings.

Þá vilja menn kannski hafa hreinar línur um hver sé forsætisráðherra landsins?

„Ég held að það sé sanngjarnt að ég gefi mér ekki langan tíma til að ígrunda þetta. Mun því greina frá minni ákvörðun hver sem hún verður á allra næstu dögum,” segir Katrín. Forsetaembættið væri gríðarlega mikilvægt og skipti þjóðina miklu máli og mjög ólíkt stjórnmálunum.

Þingflokkar stjórnarflokkanna funduðu allir í dag þar sem mögulegt framboð Katrínar var á dagskrá.

Þetta þarf væntanlega eitthvað að ræða við formenn hinna flokkanna?

„Ég hef greint þeim frá því að ég sé að íhuga þetta. Þannig að þeir eru upplýstir um það. Sömuleiðis að ég muni ekki gefa mér langan tíma til að ljúka þeirri hugsun.”

Heldur þú að þetta muni hafa einhver áhrif á stjórnarsamstarfið?

„Ég held að stjórnarsamstarfið standi ágætlega sterkum fótum hér eftir sem hingað til,” segir forsætisráðherra.

Sigurður Ingi Jóhannsson formaður Framsóknarflokksins segir að Katrín yrði öflugur kandidat til embættis forseta Íslands. Augljóslega hefði það mikil áhrif ef forsætisráðherra og öflugur stjórnmálaleiðtogi hyrfi úr stjórninni. Hins vegar væri mikilvægt að horfa til þess sem ríkisstjórnin hefði áorkað á liðnum sjö árum með öflugum vexti og stöðugleika að stóru leyti.

„Og ég held að það sé mikilvægt að ríkisstjórnin sem þá tæki við, því það kallar auðvitað á einhvers konar nýja ríkisstjórn, að hún sé jafn öflug og stöðug til að sigla í gegnum þann ólgusjó sem vissulega er á meðan verðbólgan er svona mikil,” segir formaður Framsóknarflokksins.

Einmitt, ef Katrín býður sig fram mun hún biðjast lausnar fyrir sig og ráðuneyti sitt. Á meðan hefði ríkisstjórnin stöðu starfsstjórnar. Stjórnarflokkarnir þyrftu því að koma sér saman um áframhaldandi samstarf. Ekki hvað síst hver tæki við sem forsætisráðherra.

Er sjálfgefið að einhver úr Vinstri grænum tæki það embætti eða jafnvel þú eða Bjarni mynduð taka það embætti að ykkur?

„Nú hefur forsætisráðherra ekki ennþá gefið það út að hún ætli í framboð. Þess vegna er auðvitað dálítið ótímabært að fara að svara öllum svona vangaveltum. En augljóslega hlýtur allt að koma til skoðunar við slíkar aðstæður,“ segir Sigurður Ingi.

Ríkisstjórnin kom einnig saman í dag til að staðfesta endurkomu Svandísar Svarsdóttur í embætti matvælaráðherra eftir veikindaleyfi.

Hvernig er að vera komin aftur til leiks í ríkisstjórn?

„Ég er bara í stuði.“

Gengið vel hjá þér í þínum veikindum?

„Já sem betur fer. Ég hef verið mjög gæfusöm.“

En hvernig líst þér nú á ef formaðurinn þinn fer að bjóða sig fram til forseta, ef hún gerir það?

„Við skulum sjá til,“ sagði Svandís á leið inn á ríkisstjórnarfundinn.

Á hæla hennar mætti Katrín Jakobsdóttir til fundarins. Kannski hennar síðasta ríkisstjórnarfundar áður en hún býður sig fram til forseta.

Bjarni Benediktsson formaður Sjálfstæðisflokksins var á hraðferð þegar hann mætti til þessa ef til vill sögulega ríkisstjórnarfundar.

Hvernig litist þér á ef forsætisráðherra byði sig fram til forseta Íslands?

„Við skulum bara sjá. Það eru vissulega tíðindi að hún sé að hugsa það mjög alvarlega.“

Heldur þú að ríkisstjórnin myndi hafa það af, samstarf þessara þriggja flokka, ef það yrði niðurstaðan?

„Það er fyrsta spurningin.“

Og hvert er svarið þitt?

„Við verðum að setjast yfir þá stöðu og við munum gera það,“ sagði Bjarni og minnti á að stjórnarflokkarnir hefðu meirihluta á Alþingi.

„Við höfum verið að vinna saman í sjö ár. Það er ekki annað en drengskapur og eðlilegt að við setjumst saman yfir þá stöðu.“

Það þarf að gerast hratt þá?

„Það mun gerast hratt. En það er ekki sjálfsagt hvernig úr því spilast,“ sagði Bjarni Benediktsson.