Lyngby gengur frá kaupunum á Andra: Mætir brosandi á æfingar

Andri hefur verið í láni hjá Lyngby frá Norrköping í Sviþjóð en hann kom þangað eftir að hafa lítið spilað með sænska félaginu. Andri hefur í framhaldinu skrifað undir þriggja ára samning við danska félagið.

Hinn 22 ára gamli Andri hefur staðið sig mjög vel í dönsku úrvalsdeildinni á leiktíðinni og skorað ellefu mörk í 25 leikjum í öllum keppnum.

„Það er enginn vafi á því að við erum mjög ánægðir með þetta samkomulag. Andri kom til okkar á láni eftir að við höfum verið að skoða hann í langan tíma. Hann hefur skilað til liðsins frá fyrsta degi. Hann er þegar búinn að skapa sér nafn í dönsku úrvalsdeildinni en er enn bara 22 ára gamall og á því langan feril fyrir höndum,“ sagði Nicas Kjeldsen, stjóri Lyngby Boldklub, við heimasíðu félagsins.

„Andri er leikmaður sem kemur úr hillu sem við þurfum að hafa mikið fyrir því að fá leikmenn úr. Vonandi segir það heilmikið um okkar getu til að byggja upp leikmenn að við höfum fengið hann til okkar,“ sagði Nicas.

Andri Lucas er líka sjálfur mjög sáttur með samninginn.

„Ég hef verið ótrúlega ánægður þessa fyrstu átta mánuði mína hjá Lyngby Boldklub og ég mjög sáttur að við höfðum gengið frá því að þetta verði til frambúðar,“ sagði Andri.

„Það var tekið vel á móti mér á fyrsta degi og Lyngby varð fljótt að minni annarri fjölskyldu og í raun nýtt heimili fyrir mig. Ég brosi á hverjum degi, bæði þegar ég mæti á æfingu en líka þegar ég fer heim af æfingu. Það er mikilvægt fyrir mig,“ sagði Andri.