Skikkar lög­reglu til að rann­saka stjórn að­vent­ista

Kærunni beindi kærandi til efnhagsbrotadeildar Ríkislögreglustjórans, en Ríkislögreglustjóri beindi kærunni til Lögreglustjórans á höfuðborgarsvæðinu sem vísaði kærunni frá með bréfi dagsettu 29. janúar 2024. Ómar áfrýjaði þeim úrskurði til ríkissaksóknara og hann hefur nú skikkað lögregluna til að taka upp eða hefja rannsókn á málinu.

„Ríkissaksóknari telur að ekki verið hjá því komist að mæla fyrir um rannsókn á kærunni til að leiða í ljós réttmæti hennar og hvort refsilagabrot hafi verið framin af kærðu,“ segir í bréfi sem Jón H. B. Snorrason undirritar. En Vísir hefur gögn málsins í fórum sínum.

Tengist námuvinnslu og viðskiptum við Heidelberg

Málið er flókið og tengist stórkarlalegum fyrirætlunum Heidelberg Sement og námuvinnslu í landi aðventista. Stjórn kirkjunnar hefur haldið spilunum þétt að sér og samið við undirverktaka, Eden Mining, til að annast efnissölu til Heidelberg. 

Undir eru hvorki meira né minna en mikilvægir þættir fyrirhugaðar framkvæmda Heidelberg Materials sem kosið verður um þann 1. júní næstkomandi. Þetta hefur leitt til afgerandi ágreinings innan trúfélagsins. Þetta gengur í berhögg við yfirlýst markmið safnaðarins.

Kæra Ómars beinist að þremenningunum og tengist í raun ásökunum um valdarán innan KSD. Kjör á nýrri samtakastjórn átti að fara fram á aðalfundi trúfélagsins árið 2022 í samræmi við ákvæði samþykkta kirkjunnar. Á 41. aðalfundi KSDA, sem fram fór 22. -25. september 2022 var ákveðið að vísa „námumálinu“ til sérstakrar rannsóknarnefndar á vegum Stór-Evrópudeildar þeirrar sem KSDA heyrir undir. Það hefur hins vegar dregist von úr viti og ekki hefur verið boðað til aðalfundar síðan þetta var.

Engin úrræði önnur en kæra

„Allt frá þeim tíma hefur fráfarandi samtakastjórn KSDA setið sem fastast við stjórnvölinn þrátt fyrir umboðsleysi og hávær áköll safnaðarmeðlima um boðun framhaldsfundar og kosningu nýrrar stjórnar. Á þessu rúma umboðslausa ári hafa hinir kærðu fráfarandi stjórnarmeðlimir KSDA greitt sér út laun og undirritað víðtækar fjárskuldbindingar í nafni kirkjunnar,“ svo vitnað sé beint í kæru Ómars.

Með sjálftöku launa og fjárhagslegara skuldbindinga telur Ómar að þremenningarnir hafi gerst sek um auðgunarbrot og skaðað KSDA. Í bréfi sem Kristinn Hallgrímsson hæstaréttarlögmaður ritar fyrir hönd Ómars segir meðal annars að hann telji óumdeilt að fráfarandi stjórnarmeðlimir KSDA hafi tekið sér „einræðisvald yfir málefnum og fjárreiðum kirkjunnar án tilskilins umboðs og hafi safnaðarmeðlimir engin úrræði í höndum sér önnur en kæra háttsemina til embættisins.“