Mætti í sjón­varpið eftir nokkurra ára hlé og segist hafa lært sína lexíu

„Ég er að reyna að sýna fram á það að ég hef hlustað. Ég hef lært. Ég fékk minnisblaðið,“ segir Kevin Spacey sem ræddi málin í sjónvarpsþætti Chris Cuomo. „Ég er sterklega á þeirri skoðun að sama hvaða mistök ég hef gert í lífinu, þá hafi ég þegar borgað brúsann.“

Leikarinn hefur ekki unnið í sjö ár, allt frá því að fyrstu mennirnir stigu fram og lýstu því að hann hefði brotið á þeim kynferðislega á barnsaldri. Síðan þá hafa mál gegn leikaranum verið látin niður falla fyrir rétti bæði í Bandaríkjunum og í Bretlandi.

Heimildarmynd um meint brot leikarans var nýverið sýnd í Bretlandi og ber heitið Spacey Unmasked. Þar er farið yfir meint brot leikarans og stíga fleiri fram til þess að lýsa þessum meintum brotum hans, að því er fram kemur í umfjöllun Deadline. Þar á meðal er einn leikari sem segir hann hafa káfað á sér á setti House of Cards, einna vinsælustu þátta Netflix streymisveitunnar.

Hafi ekki fengið að svara fyrir sig

Spacey neitar ásökunum sem birtast í myndinni. Hann segir ósanngirni hafa ráðið of mikilli för í vegferð MeToo hreyfingarinnar og fullyrðir að heiðarleg blaðamennska muni leiða í ljós að hann hafi ekkert rangt gert.

„Ég þarf að leggja mikið á mig til þess að endurvinna það traust sem sumir gætu hafa misst til mín,“ segir leikarinn meðal annars í viðtalinu. „Ég hef hlustað. Ég er reiðubúinn til að halda áfram með líf mitt. Ég vil sanna það að ég er heiðarlegur maður. Ábyrgðin á því er mín,“ segir Spacey.

Hann segist aldrei hafa gert neitt ólöglegt. Þá segir hann Channel 4, stöðina sem framleiðir heimildarmyndina, ekki hafa gefið honum réttmætt tækifæri til að svara ásökunum sem fram koma í myndinni. Hann hefur áður sagst hafa beðið um meiri tíma en sjö daga til þess að svara. Það hafi Channel 4 ekki tekið í mál.

Áður höfðu Hollywood stjörnur líkt og Liam Neeson, Sharon Stone og Stephen Fry komið leikaranum til varnar vegna myndarinnar. Þau segja að tími sé kominn á að hann fái að snúa aftur í leiklistina.