Åge spenntur fyrir stór­leiknum: „Ég held að allir vilji upp­lifa svona and­rúms­loft“

„Þetta er frábært. Besti staðurinn fyrir fótboltaiðkun. Ég var hérna sem leikmaður fyrir 44 árum og man vel eftir því að hafa spilað gegn Englandi. Ég vona að strákarnir nýti tækifærið og sýni ást sína á leiknum. Þetta er besti staðurinn fyrir það,“ sagði Age Hareide eftir æfingu landsliðsins á Wembley í gær. 

Það hafa nokkur skakkaföll orðið úr hópnum. Orri Steinn Óskarsson, Willum Willumsson, Hlynur Freyr Karlsson og Mikael Egill Ellertsson þurftu allir að draga sig úr hópnum í vikunni. 

„Við vorum með nokkra leikmenn sem mættu tæpir og þeir náðu ekki að jafna sig. Það gerist í enda tímabilsins. Þeir sem koma inn eru heilir og munu nýta tækifærið, alltaf gott að sjá ný andlit.“

Åge lítur á þetta sem tækifæri til að leyfa öðrum leikmönnum að spreyta sig og auka breiddina í hópnum. 

„Við verðum að hrista hópinn saman. Við munum leita til nýrra leikmanna til að auka breiddina í liðinu og nýta tækifærin gegn Englandi og Hollandi til að bæta okkur sóknarlega. Það var svekkjandi að komast ekki á EM en við þurfum að horfa fram veginn og halda áfram okkar vinnu.“

Ekki ókunnugir stórleikjum

Það eru tveir stórleikir framundan hjá Íslandi, fyrst gegn Englandi í dag og svo gegn Hollandi næsta mánudag. Það búast fáir við frábærum úrslitum en mikilvægt er að liðið láti ekki undan pressu. 

„Við spiluðum líka við stórlið í riðlakeppninni eins og Portúgal. Við mætum bara eins og alltaf, þéttir til baka en þurfum að standa okkur betur á boltanum. Reyna að halda honum svo við þreytumst ekki of fljótt, hvílum okkur á boltanum. Þetta er tækifæri til að sýna að við getum það.“

Andrúmsloftið á Wembley er engu líkt og uppselt er á leikinn á morgun. Það má búast við miklum látum. 

„Það ætti að vera það. Ég held að allir vilji upplifa svona andrúmsloft, þeir munu syngja Football‘s Coming Home eins og þeir gera vanalega. Ég mun njóta þess og vona að leikmennirnir geri það líka.“

Viðtalið allt má sjá í spilaranum hér að ofan. Leikur Englands og Íslands er klukkan 18:45 í kvöld. Hann verður sýndur beint á Stöð 2 Sport, útsending og upphitun hefst klukkan 18:15.