Skotárásarmaðurinn á Dubliner fær tíu ára dóm

Landsréttur dæmir Fannar í tíu ára fangelsi, en Héraðsdómur Reykjavíkur dæmdi hann í átta ára fangelsi í nóvember á síðasta ári.

Tvö mál gegn Fannari Daníel voru sameinuð og dæmd í einu. Hitt málið varðaði frelsissviptingu sem Fannar Daníel framdi í félagi við annan mann. Í því máli var hann ákærður fyrir kynferðisbrot og því var þinghald lokað til þess að verja nafnleynd brotaþola.

Hinn maðurinn, Ari Ívars hlýtur þriggja ára fangelsisdóm í Landsrétti, en hann hafði hlotið tveggja og hálfs árs dóm í héraði.

Fannar Daníel var ákærður fyrir að hleypa af haglabyssu inni á skemmtistaðnum The Dubliner í mars á síðasta ári. Landsréttur féllst á það að um tilraun til manndráps væri að ræða.

Í ákæru á hendur honum sagði að hann hafi farið grímuklæddur og vopnaður hlaðinni og afsagaðri haglabyssu, inn á veitingastaðinn The Dubliner í miðbæ Reykjavíkur, og beint henni í átt að þremur viðskiptavinum og einum barþjóni, sem voru við barborð staðarins.

Án viðvörunar og fyrirvaralaust hafi hann hleypt af einu skoti, þannig að höglin höfnuðu í innréttingu staðarins og áfengisflöskum með þeim afleiðingum að flöskurnar splundruðust og glerbrotum rigndi yfir fólkið.

Fimm klukkutíma frelsissvipting

Mikið var fjallað um skotárásina á Dubliner í fjölmiðlum á sínum tíma, en minna hefur farið fyrir frelsissviptingarmálinu, en með dómi Landsréttar er dómur héraðsdóms jafnframt birtur í fyrsta skipti og því minna vitað um það fyrr en nú.

Í því máli voru Fannar og Ari sakfelldir fyrir að svipta annan mann frelsi í um fimm klukkustundir á heimili hans. Þeir beittu hann ofbeldi og hótunum í því skyni að ná verðmætum af manninum, en þeir bundu hann höndum og fótum við rúm hans, hótuðu honum lífláti og annars konar ofbeldi. Fannar neyddi hann til að gefa upp lykilorð að farsíma og heimabanka sínum og Ari safnaði á sama tíma lausafé í eigu mannsins.

Þeir eru sagðir hafa borið lausaféð í sameiningu út í bifreið og horfið á braut og skilið manninn bundinn eftir.

Rétt er að vara lesendur við lýsingum sem fram koma í fréttinni að neðan.

Einnig sakfelldur fyrir nauðgun

Fannar var jafnframt sakfelldur fyrir að nauðga manninum og beita hann annars konar kynferðisbrotum á meðan hann var bundinn í rúminu. Í ákæru segir að í því hafi falist að þrýsta klaufhamri í endaþarmsop mannsins og skakað hamrinum fram og til baka. Þá hafi hann tvívegis slegið hamrinum í getnaðarlim mannsins.

Á sama tíma hafi hann tekið athæfið upp á farsíma og hótað að dreifa því ef maðurinn myndi leita til lögreglu.

Fyrir dómi sagði Fannar Daníel að á þessum tíma hefði hann verið í partíum „út um allt“ og myndi lítið en það væri út í hött að hann hefði misnotað karlmann. Hann sagðist aldrei myndu gera það.

Ari var einnig sakfelldur fyrir ýmis konar önnur brot sem vörðuðu fíkniefni, þjófnað og brot á umferðarreglum.

Sérstaklega meiðandi og niðurlægjandi

Í dómi héraðsdóms segir að Fannar hafi framið alvarleg og gróf brot og hann hafi sýnt af sér skeytingarleysi um líf og heilsu brotaþola málanna. 

Varðandi frelsissviptingar- og nauðgunarmálið segir að hann hafi á grófan hátt brotið gegn kynfrelsi mannsins og að háttsemin hafi verið sérstaklega meiðandi og niðurlægjandi.

Fannari var gert að greiða fjórum þolendum Dubliner-málsins 900 þúsund krónur hverjum um sig, og manninum sem hann frelsissvipti og nauðgaði tæplega 3,4 milljónir króna. Ara var gert að greiða honum tæplega 1,9 milljónir.