Kári Garðars­son ráðinn fram­kvæmda­stjóri Sam­takanna 78

Þetta kemur fram í tilkynningu frá Samtökunum 78, sem er hagsmunafélag hinsegin fólks á Íslandi.

Fram kemur að Kári sé menntaður íþróttafræðingur með meistaragráðu í opinberri stjórnsýslu. Hann fer til Samtakanna 78 eftir starf sem framkvæmdastjóri íþróttafélagsins Gróttu. Í tilkynningu segir að hann hafi leitt Gróttu í gegnum mikilvæga þróunartíma.

Áður hafi hann starfað sem aðstoðarskólastjóri í Dalskóla í Reykjavík, þar sem hann öðlaðist verðmæta reynslu af stjórnunar- og menntamálum.

„Við erum afskaplega spennt að fá Kára til liðs við okkur,“ segir Bjarndís Helga Tómasdóttir formaður Samtakanna ‘78. „Samtökin hafa vaxið gríðarlega síðustu ár og við erum þess fullviss að hann sé rétt manneskja til þess að fylgja þeim vexti eftir. Kári hefur mikið fram að færa í baráttunni fyrir réttindum og sýnileika hinsegin fólks á Íslandi,“ segir Bjarndís.

Ráðning Kára Garðarssonar tók formlega gildi þann 1. júlí 2024.