Brekkusöngur á Flúðum og á Vísi: Lofar sól og sumri beint heim í stofu

„Þessi hátíð hefur verið haldin í nokkur ár og það eiginlega verður ekki meira pepp, geggjað að fá að mæta, gera gott mót í Brekkusöng og taka svo ball á eftir,“ segir Gunni í samtali við Vísi. Hann segist hafa hugsað vel og lengi hvað lög hann ætli að taka og lofar sannkölluðum stuðlögum sem allir þekkja.

Það verður þétt dagskrá á Flúðum um helgina þar sem traktoratorfæra og sláttutraktoratorfæra verður á sínum stað í Torfdal á laugardegi, svo fátt eitt sé nefnt. Stuðlabandið leikur fyrir dansi á laugardagskvöld og svo verða Gunni og félagar í Skítamóral með ball á sunnudagskvöldið.

„Maður bíður bara spenntur eftir því að fá að vera á Íslandi í sumar og sól þessa helgi,“ segir Gunni hlæjandi en eflaust hefur ekki farið framhjá neinum að sumarið hingað til hefur verið vætusamt og tvísýn veðurspá fyrir helgina, þó sunnudagurinn virðist munu líta vel út víðast hvar.