Sex vilja stýra Jafn­réttis­stofu

Þetta kemur fram á vef Stjórnarráðsins. Umsækjendur um embætti framkvæmdastjóra Jafnréttisstofu eru í stafrófsröð:

• Arnrún Halla Arnórsdóttir, aðjúnkt
• Bryndís Elfa Valdemarsdóttir, sérfræðingur
• Elinóra Guðmundsdóttir, fjölmiðlafræðingur
• Jón Fannar Kolbeinsson, lögfræðingur
• Marcin Zembrowski, viðskiptafræðingur
• Martha Lilja Olsen, skrifstofustjóri

Katrín Björg Rík­arðsdótt­ir hef­ur gengt embætt­inu frá ár­inu 2017 en hún var ný­lega ráðin sem sér­fræðing­ur í kjara- og rétt­inda­mál­um hjá Visku - stétt­ar­fé­lagi.

Jafnréttisstofa annast stjórnsýslu á sviði jafnréttismála í samræmi við lög um jafna stöðu og jafnan rétt kynjanna, lög um jafna meðferð utan vinnumarkaðar og lög um jafna meðferð á vinnumarkaði. Ráðherra skipar framkvæmdastjóra Jafnréttisstofu til fimm ára í senn. Framkvæmdastjóri annast daglega stjórn stofnunarinnar og ræður starfsfólk hennar.

Meðal verkefna Jafnréttisstofu er að hafa eftirlit með framkvæmd laga á sviði jafnréttismála, sjá um fræðslu og upplýsingastarfsemi, veita ráðgjöf og aðstoð á sviði jafnréttismála, koma á framfæri ábendingum og tillögum til að ná fram auknu jafnrétti og fylgjast með þróun jafnréttismála í þjóðfélaginu og á alþjóðavettvangi, m.a. með upplýsingaöflun og rannsóknum. 

Einnig að vinna að forvörnum gegn kynbundnu ofbeldi í samvinnu við hlutaðeigandi stjórnvöld og samtök. Þá sinnir stofnunin eftirfylgni með jafnlaunavottun og jafnlaunastaðfestingu. Jafnréttisstofa er staðsett á Akureyri.

Sérstök hæfnisnefnd skipuð þremur einstaklingum mun meta hæfni umsækjenda og skila greinargerð til Bjarna Benediktssonar forsætisráðherra. Eftirfarandi kröfur eru gerðar til umsækjenda:

• Háskólapróf sem nýtist í starfi
• Gerð er krafa um reynslu af stjórnun og mannauðsmálum
• Gott vald á íslensku og færni til að koma fram og tjá sig í ræðu og riti
• Góð kunnátta í ensku og kunnátta í einu Norðurlandamáli er kostur
• Leiðtogahæfileikar
• Samskiptafærni og hæfni til að miðla upplýsingum
• Þekking og reynsla á sviði jafnréttismála
• Framsýni, metnaður og vilji til að ná árangri
• Frumkvæði, sjálfstæði í vinnubrögðum og skipulagshæfni
• Þekking og reynsla af stefnumótun, stjórnun og rekstri á sviði opinberrar stjórnsýslu sem nýtist á starfssviði stofnunarinnar.