Ríkis­stjórnin gæti ekki lengur að hags­munum al­mennings

Dómsmálaráðherra og formaður Vinstri grænna eru ósammála um forgangsröðun í málefnum útlendinga. Í síðustu viku lýsti annar ráðherra sig ósammála formanninum um orkumál.

„Ég tel það ekki forgangsmál að gera frekari breytingar á útlendingalöggjöfinni. Það er mikilvægara að áhrif breytinganna sem þegar hafa verið gerðar komi fram, og nú á forgangurinn að vera settur á innflytjendamál.“

Þetta sagði félags- og vinnumarkaðsráðherra og formaður Vinstri grænna á flokksráðsfundi VG í gær. Í hádegisfréttum okkar lýsti dómsmálaráðherra því yfir að hún væri Guðmundi ósammála og að hún myndi áfram setja útlendingalöggjöf í forgang. Hún hyggst leggja fram frumvarp til breytinga á lögunum í haust.

Í síðustu viku kallaði Guðmundur Ingi eftir því að umhverfis-, orku- og loftslagsráðherra gengi lengra í stefnumörkun í vindorkumálum, eftir að Orkustofnun gaf út virkjanaleyfi fyrir vindmyllugarði í Búrfellslundi. Umhverfisráðherra svaraði því þá til að stefnumörkun hefði átt sér stað yfir langan tíma.

Á flokksráðsfundinum var einnig samþykkt ályktun þar sem ákvörðun Bjarna Benediktssonar, formanns Sjálfstæðisflokksins og þáverandi utanríkisráðherra, um að frysta fjárframlög til Flóttamannaaðstoðar Sameinuðu þjóðanna í Palestínu var fordæmd. Ákvörðunin var tekin í janúar en greiðslur til stofnunarinnar hófust aftur í mars.

Augljós upplausn

Þorgerður Katrín Gunnarsdóttir formaður Viðreisnar segir það augljóst að meðal stjórnarflokkanna sé mikið upplausnarástand.

„Það er endalaust nöldur, rifrildi, ögrandi stjórnarflokkanna í garð hvors annars. Það sjá það allir að þessi ríkisstjórn, hún er runnin út á tíma.“

Þorgerður hefur í sumar ferðast mikið um landið og segir að hvert sem hún hafi farið hafi fólk spurt hvort ekki sé nóg komið. Þá hafi ekki skipt máli hvaða flokki fólk tilheyrði. Það séu margir komnir með nóg af ríkisstjórninni sem nú er við völd.

„Þetta snýst bara um að viðhalda sínum völdum. Á meðan blasa við þessi stóru verkefni. Í næstu viku er ársafmæli 9,25 prósent stýrivaxta. Við erum með mestu og hæstu stýrivexti í Evrópu ásamt stríðshrjáðum löndum Rússland og Úkraínu. Við erum með dýrustu matarkörfu í Evrópu. Við erum með risaverkefni á sviði orkumála, menntamála og heilbrigðismála og á meðan eru þessir ráðherrar í ríkisstjórn og flokksfólk þeirra að klóra augun hvort úr öðru. Þetta er náttúrulega ekki bjóðandi fólki í samfélaginu lengur.“

Miðað við fullt kjörtímabil eru um 13 mánuði í kosningar. Þorgerður segir þessa hegðun endurtekið efni og að hún eigi von á því að flokkarnir þrír geri allt sem í þeirra valdi stendur til að „hanga á stóli sínum“ en þetta sé á þessum tímapunkti orðið skaðlegt þjóðinni. Þau séu ekki að gæta að hagsmunum þjóðarinnar, heldur aðeins að sínum sérhagsmunum og flokka sinna.

„Stóra myndin, þau eru ekki með hana upp á borði.“

Þörf á nýrri ríkisstjórn

Þorgerður Katrín segir það oft á tíðum kómískt að vera í stjórnarandstöðu við þessar aðstæður en dregur þó ekki úr alvarleika málsins.

„Við þurfum ríkisstjórn sem gengur í verkin. Sem hættir að vera á þessu nöldri við hvort annað,“ segir Þorgerður og að það skorti sameiningu í ríkisstjórnina.

„Það eru miklir hagsmunir fólgnir í því að koma þessari ríkisstjórn burt. Kjósa og mynda hér starfhæfa ríkisstjórn.“