„Píratar hafa lengi verið mikið á­huga­mál hjá mér“

Miðflokksformaðurinn birti mynd af nýju sætisfélögunum, þeim Birni Leví Gunnarssyni, Arndísi Önnu K. Gunnarsdóttur og Andrési Inga Jónssyni, á X og virðast þau hæstánægð með nýja sætisfélagann. Sigmundur er aðeins skeptískari. Fleiri þingmenn í bakgrunni hafa sömuleiðis gaman af.

„Ég hef átt í fjölbreytilegu sambandi við Pírata, frá því að ég byrjaði í pólitíkinni,“ segir Sigmundur Davíð í samtali við Vísi, inntur eftir viðbrögðum við nýrri sætaskipan. 

„Stundum hefur mér þótt Píratarnir vera alveg á réttri línu, til dæmis með persónufrelsi og tölvumálin sem þeir eru auðvitað áhugasamir um. En stundum verða þeir alveg mjög skrýtnir. Þannig ég veit ekki alveg hverju ég á von á í þessum hópi. Það var strax byrjað að reyna að sannfæra mig um að ganga til liðs við þennan hóp sem varð þarna til fyrir tilviljun.“

Ætlar að koma Birni Leví í skó

Sætaskipan í þingsal er ákvörðuð með tilviljanakenndum hætti en dregið er í sæti við þingsetningu að fornum sið. Hver þingmaður dregur kúlu úr gömlum viðarkassa sem segir til um hvar viðkomandi skuli sitja komandi þingvetur. En aftur að Sigmundi og Pírötunum. Hann er staðráðinn í að nýta sætið til að færa þá „inn á rétta braut“. 

„Og minna þá á það góða sem þeir hafa stundum tala fyrir. Þar eru sum atriði en svo er sumt sem er algjörlega galið. Þannig þetta er annað hvort ógn, að vera í þessum félagsskap, eða tækifæri,“ segir Sigmundur.

Á myndinni fyrrnefndu er Björn Leví strax mættur á sokkaleistana, nokkuð sem hefur farið í taugar annarra þingmanna. Sigmundur segir að það hljóti að vera eitt af verkefnum vetrarins, að koma Birni í skó.

„En ég hef svo sem reynt það áður, fyrir tveimur þingum eða svo. Hann tók það ekki í mál þá, segir að sér verði svo heitt. Ég er nú heitfengur maður en læt mig nú hafa það að vera í skóm. Annað hvort af tvennu gerist; að hann verður kominn í skó þegar veru okkar saman lýkur, eða ég verð kominn á sokkaleistana. Það er allavega markmiðið að það náist niðurstaða í málið.“

„Breyta um ham“ 

Hann segir Pírata lengi hafa verið sérstakt áhugamál hjá sér. 

„Ég hef reynt að rannsaka þá árum saman og orðið tiltölulega lítið ágengt, en nú gefst kannski betra tækifæri en áður,“ segir Sigmundur. Ekki laust við að hann sé farinn að hljóma eins og hinn íslenski David Attenborough. 

„Við erum að tala um rannsóknarvinnu í fjöldamörg ár. Þegar maður heldur að maður sé að átta sig á þeim, þá breyta þeir alveg um ham og verða allt öðruvísi. En ég hef aldrei komist í svona mikla nálægð.“

Miðflokksmenn hafa verið á flugi í skoðanakönnunum og virðast ætla að nýta alla samfélagsmiðla til þess að sanka að sér kjósendum í aðdraganda kosninga. Þeir Sigmundur og Bergþór Ólason tóku nýkjörinn forseta Höllu Tómasdóttur til fyrirmyndar í dag og birtu myndskeið á TikTok innan úr Alþingishúsinu. 

„Sástu það?“ spyr Sigmundur þegar fréttamaður minnist á myndskeiðið. 

„Ég hef ekki þorað að fara á TikTok. Manni var sagt að þetta væri kínverskt njósnaforrit, en nú er mér sagt að maður sé ekki maður með mönnum nema að vera þarna inni. Það var beinlínis fyrirsát um okkur í dag sem leiddi til þess að við birtumst í fyrsta sinn á TikTok. Ég segi ekki að þetta hafi verið algjörlega óundirbúið en við vorum þarna að ganga inn í þingflokksherbergi með sólgleraugu, sem maður notar jafnan ekki innanhúss. En í þessu tilfelli var það við hæfi þar sem við teljum að það sé bjart framundan.“