Sækja hraðar fram í Dónetsk

Rússar eiga þó erfitt með að nýta sér árangurinn til að brjóta sér leið alveg í gegnum varnir Úkraínumanna, eins og þeir hafa átt erfitt með frá upphafi innrásarinnar.

Rúmur mánuður er síðan bærinn Vuhledar féll í hendur Rússa, eftir harða bardaga í rúm tvö ár. Síðan þá hafa Rússar sótt fram frá bænum, norður í átt að bænum Pokrovsk.

Sjá einnig: Versnandi á­stand í Pokrovsk

Þeir hafa einnig sótt fram norðar, nær Pokrovsk. Að minnsta kosti tveir tiltölulega stórir bæir á svæðinu hafa fallið í hendur Rússa á undanförnum dögum og er mögulegt að úkraínskir hermenn á milli þessara tveggja vígstöðva muni þurfa að hörfa eða eiga á hættu að vera umkringdir.

Nánar má skoða stöðuna á korti hóps sem kallast DeepState.

Óljóst er hvort Úkraínumenn hafi reist nýja varnargarða og skotgrafir innar í Úkraínu en um mikið flatlendi er að ræða og gæti það reynst erfitt svo nærri víglínunni. Sérstaklega með tilliti til yfirburða Rússa þegar kemur að eftirlitsdrónum og stórskotaliði.

Ætla að kveðja 160 þúsund í herinn

Óleksander Litvínenkó, forseti þjóðaröryggisráðs Úkraínu, tilkynnti á þingi í gær að kveðja ætti um 160 þúsund menn í herinn. Á það að gerast á næstu þremur mánuðum en Úkraínumönnum hefur gengið erfiðlega að fylla upp í raðir sínar á undanförnum mánuðum og með að hvíla hermenn vegna manneklu.

Samkvæmt frétt Kyiv Independent sagði Litvínenkó að frá því herlög hefðu verið sett á í kjölfar innrásar Rússa í febrúar 2022 væri búið að kveðja rúma milljón manna í herinn.

Frá miðjum maí til miðs júlí munu tæplega 4,7 milljónir manna á herkvaðningaraldri hafa skráð sig í gagnagrunn ríkisins svo hægt væri að finna þá og nærri því milljón þeirra ku vera með undanþágu vegna veikinda eða annarskonar hömlunar.

Mikið hefur verið kvartað yfir því í úkraínsku samfélagi að embættismenn og áhrifamikið fólk hafi komist hjá herkvaðningu og oft á tíðum með því að fá undanþágu hjá læknum. Meðal þeirra eru margir saksóknarar og leiddi það til afsagnar ríkissaksóknara Úkraínu í síðustu viku.

Þá fundu lögregluþjónar nýlega rúmlega sex milljónir dala í reiðufé á heimili yfirmanns læknanefndar Khmelnytskiy-héraðs.

Í frétt Wall Street Journal segir að gripið hafi verið til ýmissa leiða til að auka herkvaðningu. Sérstakir lögregluþjónar sem framfylgja herkvaðningu hafa stöðvað menn á götum borga í Úkraínu til að ganga úr skugga um að þeir hafi skráð sig í áðurnefndan gagnagrunn, eins og lög kveða á um.

Þetta hefur meðal annars verið gert á tónleikastöðum og verslunum og veitingastöðum sem sóttir eru af auðugu fólki.

„Svona lítur sanngjörn herkvaðning út,“ sagði næstráðandi í þriðja árásastórfylki Úkraínu við WSJ. „Þar sem fólk er ekki bara tekið úr þorpum og smáum bæjum, heldur einnig úr stórum borgum þar sem fólk fer rólegt á tónleika og veitingahús.“

Tæp þrjú ár eru frá því að innrás Rússa hófst. Flestir þeir sem eru viljugir til að ganga í herinn gerðu það fyrir löngu síðan. Margir eru engu að síður í felum eða hafa flúið land.

Þessi mannekla hefur leitt til þess að þeir hermenn sem hafa verið á víglínunni um langt skeið, sjá ekki fram á að komast úr hernum án þess að særast alvarlega eða falla.

Skortir einnig hergögn

Heimildarmenn WSJ segja að um tuttugu þúsund menn hefji þjálfun í hverjum mánuði en fyrr á árinu var þessi tala í 35 þúsund, skömmu eftir að herkvaðningaraldur var lækkaður úr 27 árum í 25.

Ekki er mikill pólitískur vilji til að lækka aldurinn enn frekar, þó nokkrir þingmenn og einhverjir af bakhjörlum Úkraínu hafi kallað eftir því, sökum þess að ungu fólki hefur fækkað í Úkraínu á undanförnum árum, eins og víða annarsstaðar í heiminum.

Sjá einnig: Íbúum Úkraínu fækkað um tíu milljónir frá innrásinni

Ráðamenn í Úkraínu segja að umfangsmeiri herkvaðning dugi ekki ein og sér til að leysa vanda Úkraínumanna. Þá skorti enn hergögn til að búa nýja hermenn almennilega. Þá eiga þeir bæði við vopn og bryndreka, svo eitthvað sé nefnt.

Ein leið sem Úkraínumenn hafa farið til að auka fjölda sjálfboðaliða er að gera mönnum kleift að sækja um hjá sérstökum herdeildum og fá þjálfun þar. Það hefur reynst vel hjá þekktustu herdeildum úkraínska hersins.