Fer ekki út úr húsi eftir greininguna

Lynch greindi frá því í ágúst að hann hefði greinst með lungnaþembu, langvinnan lungnasjúkdóm sem einkennist af mæði og hóstum.

„Ég verð að segja, ég naut þess mjög mikið að reykja og ég elska tóbak - lyktina af því, að kveikja í sígarettum, að reykja þær - en maður geldur þessa nautn dýrum dómi, og minn dómur er lungnaþemba. Ég hef nú verið reyklaus í tvö ár. Nýlega gekk ég undir mörg próf og góðu fréttirnar eru þær að ég er í frábæru formi fyrir utan lungnaþembuna. Ég er fullur af hamingju og ég mun aldrei setjast í helgan stein,“ skrifaði hann í færslu á X (áður Twitter).

Nú hvetur hinn 78 ára Lynch aðra til að hætta líka og segir sjálfan sig vera forvörn fyrir aðra. Í viðtali við People í vikunni greindi hann frá því að hann þurfi viðbótarsúrefni fyrir flestallt sem hann geri.

„Þú deyrð eftir viku ef þú hættir ekki“

Lynch lýsir því hvernig hann reyndi að hætta „mörgum, mörgum sinnum, en þegar eitthvað varð krefjandi fékk ég mér þessa fyrstu sígarettu og það var ferð aðra leið til himnaríkis.“ Þá hafi verið auðvelt að byrja að reykja upp á nýtt.

Árið 2020 greindist Lynch síðan með lungnaþembu en þrátt fyrir það gat hann ekki hætt að reykja. Það var ekki fyrr en tveimur árum seinna sem honum tókst það.

Hann segist hafa séð teikn á lofti „og þau sögðu ,Þú deyrð eftir viku ef þú hættir ekki'.“ 

Síðan þá hefur honum gengið vel að halda sér reyklausum og þakkar meðal annars innhverfri íhugun sinni sem hann hefur stundað í tugi ára.

Sér ekki eftir reykingunum

„Ég gat varla hreyft mig án þess að taka andköf. Eini möguleikinn var að hætta,“ segir Lynch sem er fjögurra barna faðir, þar af eru þrjú þeirra orðin fullorðin en það yngsta er hin tólf ára Lula. Það er því til mikils að lifa. Hann stendur reyndar í skilnaði við móður hennar, Emily Stofle sem er fjórða eiginkona hans.

Þessa dagana fer Lynch lítið út úr húsi til að forðast sýkingar sem gætu gert sjúkdóminn verri. Fyrir vikið er nær ómögulegt fyrir hann að leikstýra á staðnum. Hann segist þó vera opinn fyrir því að fjarleikstýra í framtíðinni.

Hann segist þó ekki sjá eftir reykingunum: „Þetta var mikilvægt fyrir mig. Ég óska þess sem hver fíkill óskar sér: að það sem við elskum sé gott fyrir okkur.“