Þór­ey gaf ekki kost á sér: „Snýst um hlut­verk mitt innan liðsins“

„Það var mjög erfitt að taka þessa ákvörðun,“ segir Þórey Anna í samtali við Vísi.

Hún er frekar hikandi við að ræða ákvörðunina, sem hún tók fyrr á þessu ári, en segist þurfa að standa með sjálfri sér. Því fari fjarri að ástæðan sé sú að hún geti ekki fórnað tíma fyrir landsliðið.

„Ég tók þessa ákvörðun út af hlutverki mínu innan liðsins. Ég átti samtal við landsliðsþjálfarann fyrir hálfu ári síðan og niðurstaðan úr því var að ég myndi ekki gefa kost á mér. Án þess að vilja fara út í smáatriði þá snýst þetta bara um það – hlutverk mitt innan liðsins,“ segir Þórey Anna.

Þessi 27 ára, örvhenta hornakona hefur spilað 45 A-landsleiki, og skorað í þeim 50 mörk. Hún var með á HM fyrir ári síðan og nýtti færin sín einstaklega vel, því hún var með bestu skotnýtinguna af öllum leikmönnum mótsins. Þórey Anna nýtti 17 af 19 skotum sínum.

Engu að síður var hlutverk hennar minna en hún vonaðist til, og fannst hún eiga skilið.

Arnar Pétursson landsliðsþjálfari hefur frekar treyst á nöfnu hennar, Þóreyju Rósu Stefánsdóttur, sem nú er einnig leikmaður hans hjá Fram þar sem Arnar gerðist aðstoðarþjálfari í sumar. Eftir ákvörðun Þóreyjar Önnu valdi Arnar Gróttukonuna Katrínu Önnu Ásmundsdóttur með Þóreyju Rósu í hægra hornið og fara þær tvær á EM.

Snýst ekki um að ég sé ekki tilbúin að fórna tíma fyrir landsliðið

Ákvörðun sína tók Þórey Anna eftir leikina við Svía um mánaðamótin febrúar-mars, eftir að hafa einnig verið óánægð með hlutskipti sitt á HM og fyrr á landsliðsferlinum.

„Ég er þá aðallega að tala um hlutverk mitt innan liðsins. Mér finnst mikilvægt að það komi fram að þetta snýst ekki um að ég sé ekki tilbúin að gefa tíma minn í landsliðið. Ég er með frábært bakland og góða vinnuveitendur sem hafa alltaf staðið þétt við bakið á mér varðandi handboltann. Málið er því ekki að ég sé ekki tilbúin að fórna tímanum mínum í þetta.

Einhvern veginn hefur það verið þannig að sama hvernig frammistöðu maður hefur sýnt þá hefur það ekki skilað manni neinu. Ég upplifi það þannig, en það getur vel verið að þjálfarinn sjái það allt öðruvísi.“ segir Þórey Anna.

„Þessi ákvörðun var mjög erfið“

Hún spilar eins og flestir leikmenn íslenska landsliðsins í Olís-deildinni hér á landi og er þar þriðja markahæst með 7,1 mark að meðaltali í leik, og bestu nýtinguna af þeim leikmönnum sem skora að meðaltali tvö mörk eða meira í leik, eða 85,3 prósent.

Þórey Anna ítrekar að það sé ekki gert af neinni léttúð að segja skilið við landsliðið:

„Þessi ákvörðun var mjög erfið og alls ekki tekin í neinum flýti. Maður verður að standa og falla með sínum ákvörðunum en ég ætla ekki að ljúga neinu um það að að sjálfsögðu væri gaman að vera þarna og berjast með stelpunum. Ég óska þeim alls hins besta á EM og vona að þeim gangi mjög vel.“

Útilokar ekki að snúa aftur

En gæti afstaða Þóreyjar Önnu breyst, á meðan að Arnar er enn landsliðsþjálfari?

„Hvað landsliðið varðar þá verður þetta bara að koma í ljós. Maður á aldrei að loka neinum dyrum og ég mun bara meta það eftir því sem tíminn líður. Auðvitað er ég svekkt yfir þessu og hefði alveg viljað taka þátt á EM, en maður verður að standa með sjálfum sér og sínum ákvörðunum.“