Perex hefur engan vegin náð sér á strik á góðum bíl Red Bull Racing og finnur sig í 8.sæti í stigakeppni ökuþóra með aðeins 152 stig. Þar er hann á eftir liðsfélaga sínum Max Verstappen sem hefur tryggt sér heimsmeistaratitilinn sem og ökuþórum McLaren, Ferrari og Mercedes.
Red Bull Racing á ekki lengur möguleika á því að verja heimsmeistaratitil sinn í flokki bílasmiða og er auðvelt að benda á þau fáu stig sem Perez hefur skilað inn sem orsakavald en Verstappen hefur tryggt sér og Red Bull Racing 429 stig.
Nú bendir allt til þess að Red Bull Racing muni gera breytingar og eru taldar yfirgnæfandi líkur á því að Perez verði látinn fara eftir tímabilið. Ummæli liðsstjórans Christian Horner nú í aðdraganda síðustu keppnishelgarinnar hefur ekki dregið úr þeim líkum.
„Staðan sem við erum í er álíka sársaukafull fyrir hann og okkur,“ sagði Horner í samtali við Viaplay. „Við veitum honum allan þann stuðning sem að þarf þar til að kemur að köflótta flagginu í Abu Dhabi. Perez nýtur þess ekki að vera í þeirri stöðu að slúðrað sé um framtíð hans í hverri viku. Hann er hins vegar nógu gamall og reyndur til þess að átta sig á stöðunni. Sjáum hvar við verðum eftir Abu Dhabi.“
Í tengslum við mögulegt brotthvarf Perez er því haldið fram að annar hvor ökuþóra systurliðs Red Bull Racing, RB liðsins, muni fylla upp í sæti Perez. Það yrðu þá annað hvort Yuki Tsunoda eða Liam Lawson sem myndu fá það sæti nema að einhverjar óvæntar vendingar myndu eiga sér stað.
