Drekinn og King Kong fá á baukinn fyrir að aug­lýsa nikótínvörur

Í frétt á vef Neytendastofu segir að stofnunin hafi haft til skoðunar auglýsingar á nikótínvörum, rafrettum og áfyllingum fyrir rafrettur, sér í lagi á samfélagsmiðlum. 

Þá hefur Neytendastofa birt ákvarðanir gagnvart tveimur fyrirtækjum vegna brota gegn auglýsingabanni, King Kong ehf. og Urriðafoss ehf., sem rekur Drekann. Í þeim kemur fram að það sé óheimilt að auglýsa vörurnar á samfélagsmiðlum. 

Undir auglýsingar falli allar myndbirtingar þar sem með beinum eða óbeinum hætti eru sýndar nikótínvörur, rafrettur eða áfyllingar fyrir rafrettur. Þetta eigi við óháð því hvort fyrirtæki hafi greitt fyrir aukna dreifingu myndanna eða ekki.

Fram kemur að Neytendastofa hafi jafnframt lagt áherslu á að lýsingar á vörunum í vefverslunum megi ekki ganga lengra en að lýsa þeim með hlutlausum hætti. Þannig teljist það brjóta gegn auglýsingabanni að birta ítarlegar lýsingar á bragði og upplifun.

Þá er það mat stofnunarinnar að auglýsingar utan á verslunum væru óheimilar, hvort sem um er að ræða ákveðnar vörur, vörumerki eða almenna tilvísun til vöruúrvals seljanda. Að sama skapi mega vörumerki fyrirtækja ekki fela í sér auglýsingu á nikótínvörum, rafrettum og áfyllingum fyrir rafrettur.

Má ekki standa „VAPE SHOP“ utan á sjoppunum

Í ákvörðun Neytendastofu vegna King Kong ehf. segir að utan á verslunum fyrirtækisins mætti finna beinar tilvísanir til nikótínvara, rafretta og áfyllingar fyrir þær, en heiti verslunarinnar væri umkringt orðunum „VAPE SHOP“ auk auglýsingar þar sem fram kæmi „10 dósir að eigin vali á 6.500 kr.“ ásamt teiknaðri mynd af því sem virðist vera nikótíndós og nikótínpúði.

Utan á verslun Drekans var sömuleiðis að finna orðin „VAPE SHOP“, að því er kemur fram í ákvörðun Neytendastofu vegna Urriðafoss ehf. Í báðum tilvikum taldi stofnunin ljóst að um væri að ræða beina tilvísun rafretta og áfyllingar fyrir þær. Með því væru fyrirtækin að brjóta gegn auglýsingabanni. 

Þá segir í báðum ákvörðununum að fyrirtækin hafi brotið gegn auglýsingabanni með því að hafa birt auglýsingar á nikótínvörum, rafrettum og áfyllingum fyrir þær á samfélagsmiðla sína, Facebook og Instagram. 

Sem fyrr segir lagði Neytendastofa stjórnvaldssekt á fyrirtækin tvö. Stofnunin taldi tilefni til að beita stjórnvaldssektum í málunum þþat sem skýrt bann við auglýsingum á nikótínvörum og rafrettum eru í lögum.