Segir kaup­verðið á Mann­lífi ekki hátt

„Ég get ekkert sagt um verðið, en það er ekki hátt. Eigendur Mannlífs eru líka hluthafar í Heimildinni þannig ávinningur okkar er líka að styrkja það concept. Þannig er hugsunin. Mín hugsun er svo bara að losna frá þessu. Þetta er orðið gott í bili,“ segir Reynir í samtali við fréttastofu um kaupin.

Hann hafi verið að reyna að losa sig frá rekstrinum í um ár. Það sé tímabært að hætta sem blaðamaður. Það taki önnur verkefni við.

„Ég hef nóg að gera. Ég er með verkefni fyrir Ferðafélagið, er með podköstin. Hitt er orðið slítandi og erfitt. Ég er eiginlega komin með nóg. Þetta er búið að vera gaman og það er fínt að hætta á þessum tímapunkti.“

Fjallað hefur verið um kaupin á Vísi í dag en tveir stjórnarmeðlimir, Hjálmar Gíslason og Vilhjálmur Þorsteinsson eru hættir í stjórn Sameinaða útgáfufélagsins sem gefur út fjölmiðilinn Heimildina vegna yfirvofandi kaupa.

Reynir segir í færslu um kaupin á Facebook að yfirtaka Sameinaða útgáfufélagsins hafi ekki í för með sér breytingar á eignarhaldi á Heimildinni. Hann verði áfram hluthafi og muni rækja sínar skyldur. Þá segir hann einnig að það hafi verið markmið eigenda Mannlífs í viðræðunum að tryggja starfsfólki áframhaldandi starf.

Hann segir í samtali við fréttastofu að um fjórir hafi verið starfandi hjá Mannlífi síðustu misseri og að tveir þeirra muni flytjast yfir til Sameinaða útgáfufélagsins.

„Ég hlakka mikið til að vera frjáls maður aftur,“ segir hann að lokum. 

Fjölskylduviðskipti

Heimildin varð til í árslok 2022 við sameiningu Stundarinnar og Kjarnans og hefur því starfað í um tvö ár. Reksturinn hefur gengið ágætlega en óhætt er að segja að skiptar skoðanir séu innan hluthafahópsins með fyrirhuguð kaup á Mannlífi.

Elín Guðrún Ragnarsdóttir, stjórnarformaður Sameinaða útgáfufélagsins, sagði í samtali við Vísi fyrr í dag að viðræður hafi átt sér stað síðan í vor. Hún vonaðist til þess að gengið verði frá kaupunum fyrir áramót. Mannlíf yrði þá gefið út sem auglýsingadrifinn vefmiðill en með aðra ritstjórnarstefnu en hann hefur verið þekktur fyrir hingað til.

Jón Trausti Reynisson er framkvæmdastjóri Heimildarinnar og Ingibjörg Dögg Kjartansdóttir eiginkona hans ritstjóri. Ekki verður þó af fjölskyldusameiningu þótt kalla mætti viðskiptin fjölskylduviðskipti þar sem Jón Trausti er sonur Reynis Traustasonar.