Ein­stakur bíll sem erfitt gæti verið að toppa

Volvo EX90 er 7 sæta rafmagns jeppi sem fólk hefur beðið eftir með óþreyju í nokkur ár og á íslenskum markaði er bílnum ætlað að keppa við bíla eins og KIA EV9. 

Volvo EX90 Ultra AWD er annar af tveimur útgáfum í boði af bílnum. Hann kostar ca 16.8 milljónir og er rétt rúmum tveimur milljónum dýrari en KIA EV9, sem er fullkomlega góður bíll og ekki margt út á hann að setja en Volvo EX90 hefur það þó fram yfir hann að vera  ekki í laginu eins og múrsteinn. Og svo það að hann er einfaldlega Volvo og þegar þú kaupir Volvo ertu að fjárfesta í stöðutákni og lúxus.

Snöggur af 7 manna bíl að vera

Volvo EX90 Ultra AWD hefur að geyma 408 hestöfl og skilar 770 Nm af togi. Þetta gerir það að verkum að hann fer frá 0 upp 100 km/klst á 5,9 sekúndum. Ekki að það sé einhver haldbær mælistika á það hversu gagnlegur bíllin er en engu að síður athyglisvert í ljósi þess að þetta er þungur 7 manna fjölskyldu bíll. Uppgefin drægi bílsins af framleiðanda við bestu mögulegu akstursskilyrðum eru 614 km.

Öll helstu þægindi

Í fjarska er bíllin nauðalíkur stóra bróður sínum XC90. En þeir eiga samt ekkert meira sameiginlegt en sætafjöldann. Skýrasta dæmið sem endurspeglar það eru málin. Volvo EX90 er 10 sm lengri og 3 sm lægri en XC 90. Volvo  EX90 kemur með öllum helstu þægindum sem fólk getur búist við af bíl í þessum flokki. Það er hiti í sætum að framan og aftan og geta farþegar í fram í einnig notið þess að vera með nudd í sætinu. Plássið í þriðju röðinni er mjög gott þó það þrengi að fólki sem er yfir 190 sm á hæð en fyrir börn og unglinga er plássið feyki nóg. Það má einnig finna allar helstu nauðsynjar aftur í eins og USB-C tengi, flöskuhaldara og miðstöð. Bíllinn kemur einnig með aðfellanlegum krók og getur bíllinn dregið 2,2 tonn.

Mjúkur og þægilegur í akstri

Fjöðrun bílsins er nánast á fullkomnum stað fyrir stóran fjölskyldubíl. Þegar keyrt er á opnum þjóðvegi er hann mjög mjúkur og þægilegur. Samt kann hann vel að tækla beygjur og aðrar ójöfnur án þess að ökumaður fái það á tilfinningunni að hann sé staðsettur á vatnsdýnu. Það allra besta við bíllinn er samt hversu gott er að sitja í honum. Sætin grípa vel um mann og eru á pari við góðan hægindastól sem hefur þann bónus að vera með virkilega gagnlegt nudd.

Einn öruggasti bíll Volvo

Þegar kemur að öryggi gæti Volvo EX90 mögulega verið fremstur meðal jafningja. Á þaki bílsins er bunga sem tengir hugann við leigubíl í London. En í þessari bungu má finna svokallaðan „lidar“ skanna sem nemur brotnar og heilar línur á vegum sem og umferð akandi og gangandi vegfarenda. Í framtíðinni áætlar Volvo að EX90 muni uppfæra sig með tækni sem gerir bílnum kleift að keyra sig svo gott sem sjálfur. Maður fær það á tilfinninguna að Volvo er enn þá mjög öruggur staður að vera á!

Er Volvo EX90 besti bíll sem Volvo hefur framleitt? Það er mögulega smekksatriði og er einfaldasta leiðin til að skera úr um það að reynsluaka honum sjálfur hjá umboði Volvo á Íslandi. Hann er allavega flaggskipið og getur Volvo verið einstaklega stolt af útkomunni. Sænski bílaframleiðandinn hefur sett markið hátt og tekist að framleiða einstakan bíl sem erfitt gæti verið að toppa.

Hægt er að horfa á þáttinn í heild sinn í spilaranum hér fyrir neðan: