Fjár­festar tóku vel í upp­gjör Festi

Festi birti uppgjör fyrir síðasta ár eftir lokun markaða í gær. Þar segir að rekstrartekjur samstæðunnar á árinu 2024 hafi numið 156.7 milljörðum króna, samanborið við 138,44 milljarða árið 2023, og hækkað um 13,2 prósent milli ára. Rekstrarhagnaður fyrir afskriftir og matsbreytingar á árinu 2024 hafi numið 12,5 milljörðum króna, samanborið við 11 milljarða árið 2023, og hækkað um 13,6% milli ára. 

Samkvæmt rekstrarreikningi og yfirliti um heildarafkomu hafi hagnaður ársins numið fjórum milljörðum krónam samanborið við 3,4 milljarða árið 2023, og heildarafkoma ársins 6,4 milljörðum, samanborið við 3,4 milljarðar árið 2023. 

Viðburðaríkt ár

Í ársreikningum segir að árið 2024 hafi verið viðburðaríkt hjá Festi. Rekstur félagsins hafi gengið ágætlega á árinu og betur en áætlanir gerðu ráð fyrir. Umhverfið hafi áfram verið krefjandi en áhrifa hás heimsmarkaðsverðs á hrávörum hafi gætt með lægra framlegðarstigi, sérstaklega í eldsneytishluta starfseminnar. 

Tíð eldgos á Reykjanesskaga hafi fækkað ferðamönnum framan af ári, en aukning á seinni helmingi ársins hafi skilað lítilsháttar aukningu í fjölda ferðamanna fyrir árið í heild milli ára. Ánægjulegt hafi verið að fjöldi heimsókna og selt magn hafi aukist í flestum verslunum milli ára ásamt því að góð aukning hafi náðst í seldum eldsneytislítrum. 

Farið hafi verið í fjölda hagræðingarverkefna á árinu sem hafi skilað góðum árangi í lækkun rekstrarkostnaðar, en áhrif hárrar verðbólgu og almennra launahækkana sem samið var um á vinnumarkaði hafi hækkað allan rekstrarkostnað. Búist sé við að verð haldist áfram hátt á hrávörumörkuðum á meðan stríð og óvissuástand ríkir í Úkraníu og fyrir botni Miðjarðarhafs en vonir standi til að verðbólga gangi niður á Íslandi eftir því sem líður á árið 2025. Einhver merki um kólnun atvinnulífs á seinni helmingi ársins hafi fundist með minni sölu í ákveðnum vöruflokkum en væntingar standi til þess að með lægri verðbólgu og lækkun stýrivaxta muni það lagast á þessu ári. 

Breyttu afkomuspá fjórum sinnum

Þann 14. júní 2024 hafi  Festi undir sátt við Samkeppniseftirlitið um kaup félagsins á öllu hlutafé í Lyfju hf. sem hafi verið síðasta skilyrðið í kaupsamningnum sem undirritaður hafi verið 13. júlí 2023. Lyfja hafi því  orðið hluti af samstæðu ársreikningi félagsins frá júlí 2024. 

Félagið hafi gefið út afkomuspá 7. febrúar 2024 fyrir árið 2024, þar sem EBITDA afkoman hafi verið áætluð 11.200 til 11.600 milljónir króna. Félagið hafi hækkað afkomuspá sína þrisvar á árinu en lækkað hana einu sinni. Afkomuspáin hafi verið lækkuð í 12.200 til 12.500 milljónir króna í nóvember, þegar félagið gerði sátt við Samkeppniseftirlitið og viðurkenndi brot í tengslum við samruna Festi og N1 árið 2018. 

Með sáttinni hafi félagið samþykkt að greiða 750 milljóna króna sekt. 

Ríflega fimmtán hundruð stöðugildi

EBITDA niðurstaða ársins hafi numið 12.511 milljónum króna, sem sé umtalsvert betri en fyrsta afkomuspá ársins gerði ráð fyrir. Aukin umsvif hjá öllum dótturfélögum Festi skýri betri EBITDA afkomu, sérstaklega í dagvöru- og eldsneytishluta samstæðunnar þar sem velta og framlegð hafi aukist mun meira en áætlanir gerðu ráð fyrir. Þá hafi afkoma Lyfju ekki verið inni í upphaflegri afkomuspá ársins. 

Stöðugildi umreiknuð í heilsársstörf hafi verið 1.533 og fjölgað um 13,4 prósent milli ára. Starfsmannafjöldi hafi verið 2.769 að meðaltali og kynjahlutfallið hafi verið 60/40, körlum í hag. Kynjahlutfall stjórnenda hafi einnig 60/40 verið. 

Eigið fé samstæðunnar í árslok hafi verið 43,5 milljarðar króna, samanborið við 35,8 milljarða króna árið 2023, að meðtöldu hlutafé að nafnverði 311 milljóna króna. Eiginfjárhlutfallið hafi verið 37,9 prósent, samanborið við 37,3 prósent árið 2023, í árslok. Lausafjárstaða félagsins sé sterk með 4,6 milljarða króna í handbært fé til ráðstöfunar í árslok og félagið vel í stakk búið að takast á við verkefnin framundan. 

Stjórn félagsins leggi til að greiddur verði 4,5 króna arður á hvern nafnverðshlut á árinu 2025 eða um 1,4 milljarðar króna.

Hækkaði um fjögur prósent

Svo virðist sem markaðurinn hafi tekið vel í ársreikning Festi en gengi hlutabréfa félagsins hækkaði um 4,03 prósent í dag. Viðskipti með bréfin námu 2,2 milljörðum króna.

Aðeins gengi Íslandsbanka hækkaði meira, um 4,94 prósent. Íslandsbanki greindi frá því eftir lokun markaða að bankinn hefði fengið heimild til kaupa á allt að 15 milljörðum króna af eigin bréfum.