Loka­til­raun til að bjarga loðnu­ver­tíð

Rannsóknaskipið Árni Friðriksson hélt út frá Hafnarfirði til loðnuleitar á laugardag. Áður var Bjarni Sæmundsson farinn í árlegan vetrarleiðangur til að kanna ástand sjávar í kringum landið en áhöfnin er jafnframt á útkikki eftir loðnu. Bæði skipin voru um helgina norður af Vestfjörðum.

„Ætlunin er að þau vinni sig til austurs frá þeim stað sem þau byrjuðu á. Til viðbótar við Árna fer Heimaey frá Vestmannaeyjum um hádegisbil í dag og Polar Ammassak sömuleiðis í fyrramálið. Þau tvö munu byrja norðaustan við land og skanna norðursvæðið til móts við Árna,“ segir fiskifræðingurinn Guðmundur J. Óskarsson, sviðsstjóri uppsjávarsviðs Hafrannsóknastofnunar.

„Leiðangur Árna var alltaf fyrirhugaður og beinist sérstaklega að því að kanna mögulega vestangöngu. Við höfum ekki fengið neinar ábendingar sem verið er að kanna. Hér er sem sagt fyrst og fremst verið að kanna hvort eitthvað af hrygningarloðnu sé seinna á ferðinni og hafi gengið inn á svæðið síðan að mælingar fóru fram þarna í janúar,“ segir fiskifræðingurinn.

En hafa áhafnir rannsóknaskipanna séð eitthvað af loðnu núna úti af Vestfjörðum?

„Þau á Árna og Bjarna hafa orðið vör við loðnu en það var ókynþroska loðna að mestu leyti. Annars er alltof snemmt að álykta nokkuð enda yfirferðin nýbyrjuð,“ svarar Guðmundur.