Viktor Gísli um Barcelona: „Eins og staðan er núna er ekkert á­kveðið“

Spænska blaðið Mundo Deportivo greindi frá því fyrir löngu að Barcelona hefði tryggt sér Viktor Gísla frá og með næsta tímabili og um nýliðna helgi ítrekaði miðillinn frétt sína og að Viktor, sem er á mála hjá Wisla Plock í Póllandi, myndi fylla í skarð Gonzalo Pérez de Vargas og mynda markmannsteymi með hinum danska Emil Nielsen, besta markmanni heims. 

Viktor Gísli er hins vegar ekki eins afdráttarlaus í svörum um framtíð sína eins og Mundo Deportivo heldur fram.

„Ég er bara enn hjá Wisla Plock og Arnar Freyr Theodórsson, umboðsmaðurinn minn, sér bara um þetta,“ segir Viktor í samtali við Vísi. „Ég ætlaði að taka ákvörðun um framhaldið núna eftir tímabilið, eins og staðan er núna er ekkert tilboð komið. Ég bíð eftir því Addi geri það sem að hann gerir best og reyni að finna eitthvað gott fyrir mig á næsta ári og árum.“

Þannig að það er ekkert í farvatninu með Barcelona?

„Ekki svo ég viti. Ég vil ekki vera mikið inn í þessu, læt Adda sjá um þetta. Hann hefur hjálpað mér mikið í gegnum árin og ég treysti honum 100 prósent og bíð eftir því að hann heyri í mér með eitthvað. Þá tökum við samtalið og ákvörðun þegar að því kemur.“

Og það hafa ekki verið nein samtöl við Barcelona undanfarna mánuði eða ár?

„Ekki svo ég viti. Addi sér alfarið um þetta. Ég vil ekki heyra frá honum þegar eitthvað er kannski að fara gerast. Ég vil bara fá að heyra af einhverju þegar að það er eitthvað á bak við það (e.concrete). Ég held mér alveg utan við þessi mál.“

Vargas er á leið til Kiel eftir yfirstandandi tímabil og Emil Nielsen til Vezprém árið 2026. Barcelona mun þurfa á nýjum markmönnum að halda og verðum við að bíða og sjá hvort að sögusagnirnar verði að raunveruleika varðandi Viktor Gísla og Barcelona. 

Vill fyrst og fremst spila í Meistaradeildinni

Viktor gekk til liðs við Wisla Plock á síðasta ári og líkar vel í Póllandi. 

„Þetta er búið að vera frábært. Klárlega rétta skrefið. Ég var ekki sáttur í Nantes, það voru margir hlutir sem mér fannst skrítnir þar. Hérna er þetta hins vegar mjög flott. Ég er að vinna með fínum markmannsþjálfara, á hverjum degi að reyna bæta ákveðna hluti og það sýndi sig bara í janúar að það virkaði. Þetta er flott lið og það er verið að dæla miklum peningi í þetta eins og er. Þau ætla að búa til alvöru framtíð hjá þessu liði, umgjörðin er mjög góð. Pólska deildin er kannski ekki sú sterkasta. Það eru kannski tvö lið fyrir utan okkur og Kielce sem eru allt í lagi í handbolta. Það er eina vonda við þetta (e. downside) en við erum að spila í Meistaradeildinni, eigum fjóra leiki eftir þar og þurfum að vinna að minnsta kosti tvo af þeim. Þetta eru bara úrslitaleikir framundan, fókusinn er þar.“

Pólska deildin ekki sú sterkasta en það skiptir Viktori Gísla mestu máli að spila í Meistaradeildinni.

„Ég hef alltaf verið með það hugarfar að vera þar á hverju einasta ári. Hvar sem það er í rauninni. Það þarf bara að samræmast markmiðum mínum persónulega sem og fjárhagslega. Aðal málið fyrir mig er hins vegar að vera spila í Meistaradeildinni á hverju einasta ári. Það var ástæða þess að ég fór frá GOG til Nantes á sínum tíma. Það hefur alltaf verið markmiðið.“