Ekki valin en draumurinn lifir

Alma Möller lét af störfum sem landlæknir vegna pólitísks draums og er í dag heilbrigðisráðherra í ríkisstjórn Kristrúnar Frostadóttur. Guðrún Aspelund sóttvarnalæknir hefur verið settur landlæknir á meðan eftirmanns Ölmu er leitað. 

Staðan var auglýst í desember og upplýst um umsækjendur í janúar. Þau voru:

• Björg Þorsteinsdóttir, læknir/ráðgjafi
• Eik Haraldsdóttir, lífeindafræðingur
• Elísabet Benedikz, yfirlæknir
• María Heimisdóttir, yfirlæknir
• Ólafur Baldursson, sérfræðingur (framkvæmdastjóri lækninga í leyfi)

Tilkynnt var um það á fimmta tímanum í dag að María Heimisdóttir hefði verið skipuð landlæknir.

Féll á stjórnunarreynslunni

Björg Þorsteinsdóttir starfar við hið virta Mayo Clinic sjúkrahús í Rochester í Minnesota í Bandaríkjunum. Hún lét flensupest ekki stöðva sig í að ræða við blaðamann. 

Hún gat staðfest að hún yrði ekki næsti landlæknir en til þess hefði hana skort stjórnunarreynslu. Hún hefur hingað til einbeitt sér að rannsóknum og vísindum.

Björg hefur búið ytra í lengri tíma ásamt dönskum eiginmanni sínum Bo Enemark Madsen. Bo er bráðalæknir og kom að uppbyggingu bráðalæknisnáms á Íslandi á árunum 2008 til 2011. Þau eiga fjögur börn. Þau fara ekki í felur með það að vera að hugsa sinn gang eftir nýlegar kosningar í Bandaríkjunum. Þeim hugnast ekki búsetan ytra eftir að Donald Trump komst til valda.

Björg segist hafa sótt um embætti landlæknis án þess að gera sér miklar vonir. Þegar hún sá listann yfir umsækjendur fólst vonin um embættið í því að hún kæmi úr öðru umhverfi. Glöggt er gests augað og allt það. Hún fór í viðtal við hæfnisnefnd en ekki í framhaldsviðtal við ráðherra.

„Ég féll á stjórnunarreynslunni,“ segir Björg en þó hvergi banginn. Hún er bjartsýn þegar hún lítur yfir lista umsækjenda enda þekki hún til allra þar.

Fór í „landlæknanám“

„Ég treysti öllu þessu fólki til að skila góðri vinnu en ég vil mjög gjarnan koma að verkefnavinnu þar sem mitt nám og þekking nýtist.“

Hún hafi ýmislegt til málanna að leggja sem geti komið sé vel í þeim verkefnum sem fram undan eru í heilbrigðismálum á Íslandi. Björg er lyflæknir og með sérfræðipróf í líknandi meðferð. Þá er hún að ljúka doktorsritgerð í lýðheilsu frá Háskóla Íslands þar sem verkefnið snýr að því að hjálpa öldruðum með nýrnabilun að velja úrræði. Þá nam hún lífsiðfræði við Harvard.

Björg segir að vinkonur hennar á Íslandi hafi á sínum tíma grínast með það að hún ætlaði utan til Bandaríkjanna í landlæknanám sökum áhuga hennar á heilbrigðismálum hér á landi. Hún segist þurfa að gera upp við sig hvort hún fari að afla sér stjórnunarreynslu eða halda áfram í vísindum og rannsóknum sem séu auðvitað mjög mikilvægt líka.

Dáðist að vinnu þríeykisins

Hún er spennt fyrir því að heilbrigðisráðuneytið sé komið undir Ölmu Möller og væri spennt fyrir því að vinna með henni í nýju hlutverki, hvernig sem það yrði.

„Sérstaklega eftir þessa frábæru vinnu sem vitringarnir þrír unnu í Covid,“ segir Björg. Hún hafi fyllst stolti að fylgjast með því hvernig faraldurinn var höndlaður á Íslandi.

„Hér var þessu svo rækilega klúðrað að það var til háborinnar skammar,“ segir Björg.

En þótt landlæknisembættið verði ekki hennar þá lifir draumurinn, þ.e. að geta lagt sitt af mörkum til íslensks heilbrigðiskerfis.

„Það hefur löngum verið draumurinn.“