Í verk­falli sem stjórnar­maður þar til að Halla víkur

Þetta tilkynnti Arnþór í tölvubréfi til framkvæmdastjóra VR á dögunum. Hann birtir bréfið í heild í niðurlagi aðsendrar greinar sem hann fékk birta hér á Vísi í gær. Tilefnið er umfjöllun um biðlaun Ragnars Þórs Ingólfssonar, alþingismanns og fyrrverandi formanns VR, og yfirlýsing hluta stjórnar félagsins vegna málsins.

Líkt og ítarlega hefur verið fjallað um í vikunni þáði Ragnar Þór rúmlega tíu milljóna króna eingreiðslu frá VR þegar hann lét af störfum eftir hafa verið kjörinn á Alþingi. Um var að ræða uppgjör á sex mánaða biðlaunum og uppsöfnuðu orlofi. 

Afkomutrygging

Ragnar Þór hefur sagst hafa þegið greiðsluna vegna þess að verkalýðsforkólfar geti átt erfitt með að komast inn á vinnumarkað að baráttunni lokinni. Hann líti á biðlaunin sem „tímabundna afkomutryggingu“. Ragnar Þór fær 1,6 milljónir króna greiddar á mánuði sem þingmaður og mun fá að óbreyttu næstu fjögur árin.

Hafi viljað fá málið fram í aðdraganda stjórnarkjörs

Í greininni rekur Arnþór að Halla hafi ásamt hluta stjórnarinnar náð að koma biðlaunamálinu fram með því að boða til neyðarfundar stjórnarinnar. Það hafi verið gert með ólögmætum hætti.

„Halla Gunnardóttir hefur náð fram því sem hún vildi á þeim tíma sem hún vildi fá biðlaunamálið fram. En það er mér hulin ráðgáta hvers vegna góða fólkið í stjórn VR sendi út sérstaka yfirlýsingu í fjölmiðla um það hversu dugleg þau eru að hafa náð að koma málinu fram í svona mikilli andstöðu vonda fólkið í stjórn VR.“

Þar vísar Arnþór til yfirlýsingar hluta stjórnar VR, þar sem tekið var undir gagnrýni á biðlaunagreiðsluna.

Sennilega fyrstur til að fara í verkfall

Í bréfi sínu til framkvæmdastjórans segir Arnþór að hann sé verulega ósáttur við framgang fomanns VR Höllu Gunnarsdóttir.

„Ítekað hefur formaðurinn farið á svig við lög og reglur félagsins þennan stutta tíma í formannsstóli. Hjartað í félaginu og leiðarstef eru þær reglur og lög sem félagar hafa sett og samþykkt. Sé ekki farið að lögum félagsins þá má segja að félagið sé rekið áfram með ólögum og annarlegum hvötum. Lýðræði og réttur stjórnarmanna eru fótum troðin sem er alvarlegt mál.“

Halla sé settur formaður en ekki kjörinn og muni starfa í nokkrar vikur fram að aðalfundi. Umboð hennar sé því frekar lítið til athafna en hún eins og aðrir eigi að fylgja lögum og reglum félagsins.

Halla eigi að taka sér leyfi

„Af því að ég virði félagið mikið og þau góðu störf sem unnin eru innan félagsins tel ég að mér sé ekki stætt á því að taka þátt í ólöglegum gjörningum stjórnar sem virðast engan endi ætla að taka.“

Eitt sé að deila um málefni og leiðir en það sé algerlega óþolandi að lög og reglur félagsins séu svívirtar.

Það  sé skoðun hans að Halla ætti að taka leyfi frá störfum sínum á meðan stjórnarkjör gengur yfir. Þannig mætti koma í veg fyrir að hún misnoti aðstöðu sína við störf stjórnar frekar.

„Ég tilkynni því hér með að ég er farinn í verkfall frá störfum stjórnar á meðan að það er óbreytt ástand og þessi vargöld stendur yfir. Sjálfsagt hefur það aldrei gerst áður að stjórnarmaður fari í verkfall vegna starfa sinna innan stjórnar en það er ekki nokkur önnur leið að bregðast við því ófremdarástandi sem er nú í verklagi innan stjórnar VR.“