Segir að Liverpool þurfi að spila besta leik tíma­bilsins til slá PSG út

Liverpool tekur á móti PSG á Anfield í kvöld. Rauði herinn er með eins marks forystu eftir 0-1 sigur í fyrri leiknum í París. Alisson átti stórleik í marki Liverpool og Harvey Elliott skoraði svo sigurmark liðsins, skömmu eftir að hann kom inn á sem varamaður.

Á blaðamannafundi fyrir seinni leikinn gegn PSG var Slot spurður að því hvort Liverpool þyrfti að spila betur en í nokkrum leik á tímabilinu.

„Já, ég held það. Þetta er heilsteyptasta lið sem við höfum mætt hingað til. Við höfum mætt Arsenal og Manchester City og þetta eru lítil atriði en ákefðin sem PSG spilar með auk þess hversu góðir þeir eru - og þeir eru eitt af ríkustu félögunum - og með frábæran þjálfara þannig að það er ekki auðvelt að spila á móti þeim,“ sagði Slot.

Slot segir að Liverpool ætli ekki að vera varfærið í leiknum í kvöld.

„Við reynum að spila til sigurs í öllum leikjum. Við reyndum það líka í síðustu viku. Við ætluðum ekki að vera svona aftarlega. Við viljum spila annan leik, markmiðið er alltaf það sama og við ætlum ekki að spila upp á jafntefli,“ sagði Slot.

Leikur Liverpool og PSG hefst klukkan 20:00 og verður sýndur beint á Vodafone Sport.