„Það dugar yfirleitt til að spila handboltaleik“

Valur Páll Eiríksson skrifar 12. mars 2025 14:31

Snorri Steinn Guðjónsson stýrir íslensku liði í dag sem er töluvert frábrugðið því sem var á HM í janúar. vísir/Vilhelm

Snorri Steinn Guðjónsson, landsliðsþjálfari karla í handbolta, stýrir löskuðu liði sem mætir Grikklandi ytra í undankeppni EM síðar í dag. Töluverð meiðsli herja á íslenska hópinn en Snorri kveðst hafa trú á þeim mönnum sem eru til staðar.

Níu leikmenn sem fóru á HM í janúar síðastliðnum eru fjarverandi vegna meiðsla en þeir spanna allar stöður vallarins.

Markvörðurinn Viktor Gísli Hallgrímsson er frá auk Bjarka Már Elíssonar, Elvars Arnar Jónssonar og Gísla Þorgeirs Kristjánssonar. Hægra megin eru þrjár skyttur frá, Ómar Ingi Magnússon, Viggó Kristjánsson og Teitur Örn Einarsson auk línumannana Arnars Freys Arnarssonar og Sveins Jóhannssonar.

Þá bárust af því fréttir í gærkvöld að Aron Pálmarsson geti ekki spilað leik dagsins vegna kálfameiðsla.

Snorri Steinn þarf því að treysta á frábrugðinn hóp í komandi leikjum við Grikki.

„Við erum með sextán menn heila og það dugar yfirleitt til að spila handboltaleik. Auðvitað var smá hausverkur að velja liðið en eftir að það var klárt hætti ég að velta því fyrir mér að því hverja vantaði. Fór bara að einbeita mér að því sem ég er með í höndunum og þessum leik,“ segir Snorri Steinn.

Þarf að velja og hafna áherslum

Meiðslin hafi vissulega áhrif á undirbúning en Snorri Steinn kveðst hafa fulla trú á hópnum sem er til staðar.

„Þetta hefur áhrif. Þú labbar ekkert inn í þá hluti sem þú varst að gera í janúar, kannski hlutir sem þú ætlaðir að byggja á og gengu vel þá. Það er ekkert langt síðan það var, auðvitað hefði það verið best og ákjósanlegast. En það er bara ekki staðan. Ég vissi alveg að það væru margir tæpir þó ég hafi kannski gert mér vonir um að einhverjir af þeim myndu ná þessum leikjum,“

„En um leið og þetta lá fyrir og ég valdi hópinn hætti ég að velta því fyrir mér. Úr því sem ég hef úr að vleja er þetta sterkasta liðið okkar í dag og við þurfum bara að einbeita okkur að því. Við getum ekki verið að tala um það endalaust. Við höfum bara nýtt þessar tvær æfingar eins vel og hægt er. Það þarf auðvitað aðeins að velja og hafna, þú kannski getur ekki farið yfir alla hluti og þú þarft að koma einhverjum inn í hlutina sem hafa ekki verið eins mikið inni í þeim eins og aðrir,“ segir Snorri Steinn.

Ísland mætir Grikklandi klukkan 17:00 í dag. Leikurinn verður sýndur á RÚV en lýst í beinni textalýsingu hér á Vísi.