Macland gjald­þrota: „Bruninn fór með þetta“

Í auglýsingu í Lögbirtingablaðinu segir að bú Makklands ehf. hafi verið tekið til gjaldþrotaskipta með úrskurði Héraðsdóms Reykjavíkur þann 5. mars síðastliðinn.

Guðfinnur Sölvi Karlsson, oftast kenndur við Prikið, var fyrirsvarsmaður félagsins. Hann eignaðist tæpan helming í félaginu árið 2023 á móti viðskiptafélögum sínum. 

„Hún verður ekki opnuð aftur. Ekki af okkur allavega. Bruninn fór með þetta, við vorum auðvitað með raftækjaverslun og það sagði sig svo sem sjálft hvernig þetta myndi fara að einhverju leyti,“ segir Guðfinnur í samtali við Vísi varðandi afdrif verslunarinnar. 

Bruninn sem hann vísar til er stórbruninn sem varð í Kringlunni, þar sem Macland hafði verið til húsa um nokkurt skeið, í júní í fyrra.

Gert að segja sérfróðu starfsfólki upp

Guðfinnur segir aðdraganda gjaldþrotsins mega rekja til brunans og þess ferlis sem tók við eftir hann. Eigendum verslunarinnar hafi verið gert að segja upp starfsfólki til þess að geta þegið bætur úr rekstrarstöðvunartryggingu. Starfsfólki sem hafi verið sérhæft í viðgerð á Apple-vörum.

Síðar hafi tryggingarfélagið sagt að opna þyrfti á ný, þar sem aðstæður í Kringlunni leyfðu það. Flestar verslanir, sem þurfti að loka eftir brunann, voru opnaðar á ný í lok nóvember í fyrra.

Hins vegar hafði áður verið greint frá því að verslun Eirbergs yrði ekki opnuð á ný og skömmu síðar að ballið væri búið hjá Maclandi sömuleiðis.

„Að einhverju leyti er okkur skipað að opna, af því að við verðum auðvitað að opna til að standa við skuldbindingar. Þá vorum við búnir að segja upp sérhæfðu starfsfólki, ég stekk ekkert inn og fer að gera við einhverjar Apple-tölvur, það er ekki eins og við höfum verið að selja einfaldari hluti. Þar kom verst út auðvitað verkstæðið, þú opnar ekkert bara Apple-verkstæði, það var langur prósess að fá þetta. Þegar verkstæðið er farið og sérhæfingin sem mennirnir þar voru með, þá gekk þetta ekki upp,“ segir Guðfinnur.

Starfsfólkið þegar fengið sitt

Hann segir að starfsfólk hafi þegar fengið allar launakröfur greiddar, sem skipti mestu máli í þessu leiðinlega máli öllu saman. Þá voni hann að skiptastjóri nái að afla búinu nægra fjármuna, meðal annars með sölu vörumerkisins og innheimtu bótakrafna vegna brunans, til þess að unnt verði að gera upp við alla birgja. 

Loks segir hann að fyrsta verk eftir brunann hafi verið að reyna að bjarga gögnum viðskiptavina, enda hafi að meðaltali verið um fimmtíu tölvur á verkstæðinu á hverjum tíma. Í því verkefni hafi allir lagst á eitt, starfsfólk, birgjar og önnur fyrirtæki í bransanum.

„Allir stóðu með okkur og mér skildist að við hefðum náð að bjarga öllu, held ég, ég ætla ekki alveg að segja það hundrað prósent, en ég man allavega ekki eftir því að það hafi komið kvörtun vegna þess.“