Besta-spáin 2025: Litað út fyrir

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með leik Íslandsmeistara Breiðabliks og Aftureldingar laugardaginn 5. apríl.

Íþróttadeild spáir Stjörnunni 5. sæti Bestu deildarinnar í sumar og liðið fari niður um eitt sæti frá því á síðasta tímabili.

Eftir frábært gengi eftir að Jökull Elísabetarson tók við Stjörnunni eftir sex umferðir tímabilið 2023 voru Garðbæingar brokkgengari í fyrra. Þeir áttu glimrandi leiki en duttu hressilega niður þess á milli, sérstaklega framan af sumri. Stjarnan endaði hins vegar tímabilið á jákvæðum nótum. Liðið tapaði aðeins einum af síðustu tíu leikjum sínum og endaði í 4. sæti. Það dugði þó ekki til að komast í Evrópukeppni þar sem KA varð bikarmeistari.

Jökull fer sínar eigin leiðir í þjálfun og er óhræddur að lita út fyrir. Hann gerir miklar breytingar á milli leikja og tilraunamennskan er mikil. Það getur verið kostur - Stjörnuliðið er mjög sveigjanlegt og eflaust erfitt að greina - en það getur líka verið erfitt að ná upp stöðugleika.

Herra Stjarnan, goðsögnin í Garðabænum, Daníel Laxdal, lagði skóna á hilluna eftir síðasta tímabil og sömu sögu er að segja af Hilmari Árna Halldórssyni og Þórarni Inga Valdimarssyni. Óli Valur Ómarsson stökk síðan yfir til Breiðabliks og Róbert Frosti Þorkelsson, sem lagði upp níu mörk á síðasta tímabili, fór í atvinnumennsku. Mikil reynsla er því farin úr Stjörnuliðinu auk þess sem tveir af bestu ungu leikmönnum liðsins eru horfnir á braut. Skörð þeirra verða ekki fyllt svo glatt.

Stjarnan plokkaði skrautfjaðirnar af Vestra og fékk Andra Rúnar Bjarnason og Benedikt Warén. Alex Þór Hauksson sneri aftur í Stjörnuna eftir eitt ár í KR og Samúel Kári Friðjónsson og Þorri Mar Þórisson eru komnir heim eftir mislanga dvöl í atvinnumennsku.

Kastljósið verður á Samúel sem spilaði sem atvinnumaður í rúman áratug og var í HM-hópi Íslands 2018. Hann kom sér í fréttirnar fyrir ljóta tæklingu í leik gegn KR í Lengjubikarnum en ætti að nýtast Stjörnuliðinu vel. Einnig verður gaman að sjá hvernig Benedikt spjarar sig í Garðabænum eftir góð ár fyrir vestan. Þorri fyllir stöðu hægri bakvarðar og Andri Rúnar veitir Emil Atlasyni samkeppni um framherjastöðuna. Svo gæti Jökull notað þá eitthvað saman. 

Emil hefur verið í miklum ham undanfarin þrjú tímabil og skorað samtals 42 mörk í Bestu deildinni. Svo er Stjarnan með gnótt af spennandi miðju- og kantmönnum. Má þar meðal annars nefna Guðmund Baldvin Nökkvason, Hauk Örn Brink, Benedikt, Örvar Eggertsson og Adolf Daða Birgisson.

Stjörnuliðið er gríðarlega vel skipað og Jökull hefur úr mörgum góðum leikmönnum að spila. Helsta spurningarmerkið er kannski miðvarðastaðan en Stjörnumenn vonast til að Sigurður Gunnar Jónsson fylgi eftir góðri spilamennsku undir lok síðasta tímabils. Eftir að hafa verið á bekknum hjá Lengjudeildarliði Leiknis kom hann aftur í Garðabæinn um mitt mót. Sigurður spilaði tíu leiki í Bestu deildinni í fyrra. Stjarnan vann sex þeirra, gerði tvö jafntefli, tapaði tveimur og hélt fjórum sinnum hreinu.

Ekki vantar möguleikana og hæfileikana í Stjörnuliðið og það eru forsendur til að ná árangri. Lágmarkskrafan hlýtur að vera að ná Evrópusæti og það er vel gerlegt. Titilbarátta er frekar langsótt en sumarið í Garðabænum getur sannarlega orðið eftirminnilegt.