Heims­frægir dansarar kenndu nem­endum Brynju Péturs

Hollensku systurnar eru með eina milljón fylgjenda á samfélagsmiðlinum Instagram. Brynja segir í samtali við Vísi að þær séu skemmtilegt dæmi um það þegar raunveruleg gæði og miklar vinsældir fari saman. Það er hefð hjá Brynju að fá gestakennara reglulega til landsins en hún segir það hafa komið nemendum skólans vel á óvart að það væru systurnar sem væru á leiðinni til landsins.

„Það var ótrúlega gaman að svipta hulunni af því hver væri að koma, það voru gríðarleg fagnaðarlæti og spenna þegar ég sagði þeim að það væru þær Norah, Yarah og Rosa,“ segir Brynja hlæjandi. Hún segir systurnar hafa dansað frá unga aldri og sinnt honum allar götur síðan.

Sjá má systurnar dansa í Instagram færslunni hér fyrir neðan. 

Brynja útskýrir að það geti verið erfitt að komast í góða Hiphop danstíma, því vinsældir dansstílsins séu svo miklar. Auðvelt sé að auglýsa Hiphop námskeið og fylla þau á nafninu einu saman vegna eftirspurnar.

„Systurnar koma inn í zeitgeistið með hárfína danstækni og þykkt groove - sem er einmitt aðalsmerki Hiphop stílsins. Þeirra viðvera hefur sett „alvöru Hiphop dans“ aftur í forgrunninn og eflt samfélagið svo um munar.“

Vinsælasta dansformið

Brynja segir að þau í Dans Brynju Péturs sérhæfi sig í kennslu á góðum dangsrunni og réttri tækni í Hiphop og fjölbreyttum Street stílum líkt og Dancehall, Top Rock, Waacking og Popping.

„Þó almenningur kannast mögulega ekki við nöfnin á þessum stílum þá eru þetta einhver vinsælustu dansform dagsins í dag og sjást í myndböndum og á tónleikaferðalögum hjá Chris Brown, Rihanna, Kendrick Lamar, Doechii og fleiri tónlistarmönnum.“

Sjálf hefur Brynja lært hjá frumkvöðlum á sviðinu síðan 2007. Mörg þeirra hafi komið til Íslands að kenna við dansskólann frá árinu 2012. Þar segir Brynja að risanöfn hafi verið á ferðinni, meðal annars danshöfundar Michael Jackson, Janet Jackson, Mariah Carey, Beyoncé, Cardi B og fleiri listamanna.

Íslenskir dansarar með framúrskarandi Hiphop bakgrunn

„Það urðu til mörg „bucket list móment“ þegar fólkið okkar dansaði með Norah, Yarah og Rosa um helgina og er auðsjáanlegt að íslenskir dansarar eru einstaklega sterkir og komin langt í sinni dansþjálfun. Það var eflandi fyrir þau að finna afrakstur vinnu sinnar eftir að hafa æft til fjölda ára og standa nú við hliðina á fyrirmyndunum sínum og gefa þeim lítið eftir.“

Brynja segir dansskólann stefna á að halda áfram góðum tengslum við systurnar. Það hafi verið frábær stemning á meðan þær kenndu dansinn, meðal annars var haldið í dagsferð og út að borða.

„Næst sjáum við þær í júlí í New York á metnaðarfullu tveggja vikna námskeiði með frumkvöðlum Hiphop og House stílanna, sem öll eru frá New York. Þarnæst sjáum við þær í nóvember í Malmö þar sem við keppum með atriði og tökum þátt í böttlum. Svo þarf að plana næstu Íslandsheimsókn!“