Besta-spáin 2025: Loftið verður að haldast í blöðrunni

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild kvenna með árlegri spá sinni fyrir mótið. Keppni í deildinni hefst með tveimur leikjum þriðjudaginn 15. apríl.

Íþróttadeild spáir FH 7. sæti Bestu deildarinnar í sumar og liðið lendi einu sæti neðar en á síðasta tímabili.

FH vann sér sæti í Bestu deildinni haustið 2021. FH-ingar vöktu athygli fyrir skemmtilega spilamennsku á nýliðatímabilinu 2022 og enduðu í 6. sæti með 29 stig. Sjötta sætið var einnig niðurstaða síðasta tímabils þótt stigin hafi verið fjórum færri.

Eins og 2023 gaf FH eftir á lokasprettinum í fyrra og tapaði öllum leikjunum í úrslitakeppninni. Alls tapaði FH fjórtán leikjum í fyrra en aðeins Keflavík, sem féll, tapaði fleiri. FH-ingar unnu hins vegar átta leiki og gerðu aðeins eitt jafntefli.

FH hefur nú sitt þriðja tímabil í röð í Bestu deildinni og stefnan er væntanlega sett á að komast í úrslitakeppni efri hlutans þriðja árið í röð. Bræðurnir Guðni og Hlynur Svan Eiríkssynir eru sem fyrr þjálfarar FH.

FH fékk á sig 49 mörk á síðasta tímabili, flest allra liða, og miðað við leikmennina sem liðið hefur fengið í vetur á að bæta úr því. Hildur Þóra Hákonardóttir kom frá Breiðabliki og tvíburasysturnar Íris Una og Katla María Þórðardætur eru einnig komnar í Krikann. Þær ættu að styrkja varnarleik Fimleikafélagsins enda allt góðir og reyndir leikmenn.

FH hefur svo fengið tvo erlenda leikmenn; Mayu Hansen frá Bandaríkjunum og Deju Sandoval sem lék með FHL á síðasta tímabili. Hansen er framherji sem kemur úr bandaríska háskólaboltanum og hún þarf að axla mikla ábyrgð í sóknarleik FH. Sandoval er bandarískur varnarmaður sem lék alla átján leiki FHL í Lengjudeildinni í fyrra.

Hvað segir sérfræðingurinn?

„Hafnfirðingar eru á leið inn í sitt þriðja tímabil í röð í Bestu deildinni. Niðurstaðan síðustu tvö tímabil hefur verið 6. sætið. Sem nýliðar sumarið 2023 var árangurinn frábær en kannski ákveðin vonbrigði að ná ekki að gera betur árið á eftir. Halda jú 6. sætinu en safna aðeins færri stigum,“ segir Mist Rúnarsdóttir sem verður sérfræðingur í Bestu mörkunum líkt og undanfarin ár.

„Það hafa verið miklar mannskapsbreytingar á milli ára og virðist vera að einhverju leyti áfram. Nema hvað að ungu stelpurnar sem hafa fengið smjörþefinn af stóra sviðinu síðustu tímabil eru að vaxa í stærri skó og þar með stærri hlutverk.“

„Efniviðurinn í Hafnarfirði er geggjaður og með klókindum, góðri stemmningu og ábyrgðarfullu framlagi eldri leikmanna gæti FH stillt upp mjög spennandi liði. Það er alltaf gaman að horfa á liðið spila og hugrekki og þrautseigja eru orð sem mér finnst lýsa FH. Með aga og einbeitingu geta þær gert vel hvar sem er en þær þurfa að finna stöðugleika.“

„Liðið hefur sótt áhugaverðan liðsstyrk sem við eigum eftir að sjá betur þegar líður á. Tvíburasysturnar reynslumiklu frá Sandgerði, þær Katla María og Íris Una, sameinast á ný og vilja stimpla sig inn af krafti. Þá hefur reynst FH-ingum vel að sækja varnarmenn austur og hin öfluga Deja Jaylyn Sandovil getur vonandi lagt sitt af mörkum til að binda saman varnarleikinn. Eins og staðan er núna sé ég FH halda sig á svipuðum slóðum í deildinni og undanfarin tímabil og berjast um sæti í efri hlutanum.“

Fylgist með

Thelma Karen Pálmadóttir er afar efnileg og einn af fjölmörgum lofandi leikmönnum í Kaplakrikanum. Þrátt fyrir að vera fædd 2008 hefur hún leikið alls 25 leiki í Bestu deildinni. Hún lék sína fyrstu leiki sumarið 2023, þá aðeins fimmtán ára. Thelma lék nítján af 23 deildarleikjum FH á síðasta tímabili og hlutverk hennar verður eflaust enn stærra í sumar.

Í besta/versta falli

Grunnmarkmið FH-inga hlýtur að vera meðal sex efstu liða deildarinnar og komast í úrslitakeppni efri hlutans þriðja árið í röð. Það er vel gerlegt en það er erfitt að sjá FH fara mikið ofan en í 5. sæti. Liðið gæti svo hæglega endað á neðra skiltinu, sérstaklega ef varnarleikurinn lagast ekki. Þá vilja FH-ingar eflaust enda tímabilið í ár á betri nótum en 2023 og 2024 og passa að botninn detti ekki algjörlega úr leik liðsins.