Um­mæli Trumps um „meiriháttar lúser“ leggjast illa í markaðinn

Hlutabréfamarkaðir í Bandaríkjunum tóku aðra dýfu í gær sem meðal annars er rakin til ummæla Donalds Trump Bandaríkjaforseta um Jerome Powell seðlabankastjóra landsins. Í færslu á samfélagsmiðlum kallaði Trump Powell „meiriháttar lúser,“ og „herra of seinn,“ þar sem hann hafi ekki lækkað vexti, sem Trump vill að hann geri. 

Konráð Guðjónsson hagfræðingur og fyrrverandi efnahagsráðgjafi stjórnvalda, segir að ýmislegt kunna að skýra lækkunina nú. Einkum tvennt komi þó upp í hugann, annars vegar vísbendingar um að það sé að hægja á efnahagslífinu í Bandaríkjunum sem rekja megi til tollastefnu forsetans, og hins vegar sé markaðurinn að bregðast við atlögu Trump að seðlabankastjóranum.

„Við erum að sjá sífellt fleiri vísbendingar um að það sé að hægja á efnahagslífinu í Bandaríkjunum. Þvert á markmiðið sem er að auka til dæmis iðnframleiðslu að þá sé hún alla veganna núna til skemmri tíma að fá talsvert högg á sig,“ segir Konráð. Hins vegar hafi yfirlýsingar Trump um seðlabankastjórann hrist nokkuð upp í mörkuðum.

„Þá fara fjárfestar líka í öruggt skjól af því að þá er það metið þannig að það sé bara meiri hætta á því að það verði einhvers konar skammtíma pólitísk markmið sem ráði því hvað seðlabanki Bandaríkjanna gerir og í staðinn verði verðstöðugleika mögulega fórnað,“ segir Konráð.

Enginn húmor fyrir atlögu að sjálfstæði seðlabankans

Þetta líti markaðurinn á sem aðför að sjálfstæði seðlabankans. „Já, án nokkurs vafa og það er raunverulega verið að velta fyrir sér hvort að hann [Trump] muni finna einhverjar leiðir til að losna við Jerome Powell áður en skipunartíma hans lýkur á næsta ári. Mér sýnist nú að flestum finnist það ólíklegt og maður trúir nú ekki öðru en að ráðgjafar Trump og hann sjálfur átti sig á því að það er bara að fara að hella olíu á eldinn,“ segir Konráð.

Glæður lifi enn vegna yfirlýsinga og aðgerða Trump um tolla sem ekki hafi farið vel í markaðinn. Þá gætu yfirlýst markmið Trump um ávinning af tollastefnu verið að snúast upp í andhverfu sína, að minnsta kosti til skemmri tíma. „Ef að hann myndi með einhverri gerræðislegri ákvörðun sparka seðlabankastjóranum þá held ég að það myndi fara vægast sagt illa í markaði og í koma raun og veru í bakið á honum og hans markmiðum. Hver sem þau svo sem eru,“ segir Konráð.

Niðursveifla í heimshagkerfinu hefði áhrif á Ísland

Hann segir erfitt að segja nákvæmlega til um möguleg smitáhrif til Íslands að svo stöddu. Ísland muni hins vegar ekki fara varhluta af því ef þetta leiðir til niðursveiflu í heimshagkerfinu.

„Þau eru náttúrlega einhver, það hafa verið lækkanir á íslenskum hlutabréfamarkaði núna í morgun, mögulega útaf því sem er að gerast úti. En við þurfum bara að bíða og sjá, ég held að eftir sem áður séum við í tiltölulega góðu skjóli frá þessum átökum. Bæði vegna þess að við erum fyrir utan þetta tollastríð alla veganna að svo komnu máli og stöndum bara nokkkuð sterkt til að takast á við það sem er framundan,“ segir Konráð.