Góður rekstur Mos­fells­bæjar og fram­tíðin björt

Ársreikningur Mosfellsbæjar 2024 hefur nú verið samþykktur og afgreiddur úr bæjarstjórn eftir tvær umræður lögum samkvæmt. Það er verulega ánægjulegt að niðurstaða hans er jákvæð og í góðu samræmi við fjárhagsáætlun. Í því rekstrarumhverfi sem sveitarfélög búa við um þessar mundir er það ekki sjálfsagður árangur. Niðurstaðan sýnir styrkt aðhald í rekstrinum og að áætlanir ganga vel eftir. Það er ábyrgðarmikið og krefjandi verkefni að stýra bæjarfélagi og huga að öllu því sem viðkemur rekstri þess, uppbyggingu og þjónustu við bæjarbúa. Mosfellsbær veitir góða þjónustu og hér verður haldið áfram að byggja upp öflugt samfélag þar sem gott er að búa.

Ársreikningur sýnir að rekstrarniðurstaða A og B hluta er jákvæð um 877 milljónir. Allar helstu lykiltölur standa vel hjá Mosfellsbæ. Þannig er skuldaviðmið samkvæmt reglugerð 94,5% eða sama hlutfall og í fyrra þrátt fyrir mikið framkvæmdaár. Ytri aðstæður í rekstri sveitarfélagsins, þá sérstaklega vaxta- og verðbólgustig, hafa batnað til muna milli ára og ánægjulegt að áætlaður fjármagnskostnaður í fjárhagsáætlun stóðst fyrir árið 2024. Það breytir því þó ekki að verðbólgan er enn of há og mjög stór áhættuþáttur í rekstri sveitarfélaga.

Framkvæmdir

Á árinu 2024 var framkvæmt fyrir 3,7 milljarða. Það gerir árið að einu mesta framkvæmdaári í sögu Mosfellsbæjar. Stærsta framkvæmd ársins var nýr 150 barna leikskóli í Helgafellslandi sem taka á til starfa í sumar. Þá má nefna framkvæmdir eins og íþróttahús Helgafellsskóla, endurbætur á leikskólanum Reykjakoti, stórframkvæmdir við endurgerð Varmárvalla, endurbætur skólalóða og gatnagerð í 5. áfanga Helgafellshverfis og á athafnasvæði í Korputúni. Já, Mosfellsbær er sveitarfélag í miklum vexti og nauðsynlegt að halda vel á spöðunum í uppbyggingu. Stór verkefni eins og uppbygging Blikastaðalands eru fram undan og gríðarlega mikilvægt að vel sé vandað til alls undirbúnings þar.

Byggingarréttur

Eins og fram kemur hér að ofan var rekstrarniðurstaða ársins 877 milljónir króna. Tekjur ársins námu alls rúmum 22 milljörðum króna. Hluti þeirra tekna voru byggingarréttargjöld sem námu alls 753 milljónum króna. Afar mikilvægt er að hafa hugfast að byggingarréttargjöld eru einsskiptistekjur. Það er því mikilvægt að ofáætla slíkar tekjur ekki við gerð fjárhagsáætlunar enda þarf lítið að gerast til þess að tekjur af byggingarrétti skili sér ekki. Þegar litið er til nágrannasveitarfélaga Mosfellsbæjar er ljóst að ef byggingarréttargjalda hefði ekki notið við hefði niðurstaða margra þeirra orðið allt önnur og verri en raun ber vitni.

Meirihlutinn í Mosfellsbæ stefnir að sjálfsögðu alltaf að sjálfbærum rekstri og hin góða niðurstaða ársins sýnir að það er mikilvægt að halda vel um alla þræði sem rekstur sveitarfélagsins er ofinn úr.

Samfélagið

Það er mikilvægt að muna að þrátt fyrir að við gerum upp rekstur sveitarfélagsins eins og lög gera ráð fyrir og fjöllum í ársreikningi og ársskýrslu um kennitölur og rekstrarafgang þá er rekstur sveitarfélags ekki eins og rekstur á fyrirtæki. Við erum nefnilega að reka samfélag.

Það eru mörg verkefni umfram lögbundin verkefni sem sveitarfélög sinna sem eru til þess fallin að bæta lífskjör bæjarbúa, efla félagsleg tengsl, auka lýðheilsu og almennt að auðga tilveruna. Þannig myndu sennilega fáir kjósa samfélag án leikskóla, íþróttaaðstöðu eða menningarstarfsemi.

Gagnlegt er að skoða í hvað tekjur sveitarfélagsins eru nýttar. Þar skera sig úr tveir málaflokkar sem báðir teljast til lögbundinna verkefna sveitarfélaga. Þannig fara 53,4% tekna í fræðslumál og 21,9% í velferðarmál, Samanlagt fara í þessa tvo gríðarlega mikilvægu málaflokka 77,3% tekna.

Þá standa eftir 22,7% sem dreifast á alla aðra starfsemi sem sveitarfélagið sinnir. Starfsemi sem að stórum hluta skapar þann ramma sem við viljum hafa utan um fjölbreytt, gróskumikið og skapandi mannlíf. Hér undir eru íþrótta og tómstundamál sem fá 10,7% tekna í sinn hlut. Öflugt íþrótta- og tómstundastarf er geysilega mikilvægt fyrir bæjarbraginn og uppeldisaðstæður unga fólksins okkar. Hér undir fellur líka alls kyns menningar- og félagsstarf. Hlégarður kom aftur heim og á árinu 2024 voru haldnir 264 viðburðir í húsinu eða 22 viðburðir á mánuði að jafnaði. Brúarland hefur slegið í gegn með öflugu félagsstarfi eldri borgara sem þar stendur bæjarbúum til boða. Starfsemi Bókasafns Mosfellsbæjar og Listasalarins blómstrar sem aldrei fyrr.

Þá má ekki gleyma þeirri áherslu sem lögð hefur verið á aukna stafræna þjónustu sem bæði gerir þjónustu, upplýsingamiðlun og upplýsingaöflun markvissari og fljótlegri bæði fyrir íbúa og starfsfólk bæjarins. Þar hefur verið lyft Grettistaki. Við gætum haldið áfram langri upptalningu áhugaverðra verkefna en öll þessi verkefni og mörg fleiri til má fræðast um í ársskýrslu Mosfellsbæjar sem kom út á vefrænu formi samhliða samþykkt ársreiknings. Ársskýrslan varpar skýru og myndrænu ljósi á rekstur bæjarins. Ársskýrsluna og auðvitað ársreikninginn sjálfan má nálgast hér https://arsskyrsla.mos.is/

Stolt og bjartsýni

Á heildina litið sýnir ársreikningur Mosfellsbæjar fyrir árið 2024 að vel tókst til í rekstri bæjarins. Við erum stoltar af niðurstöðunni og stoltar af okkar frábæra bæjarstjóra Regínu Ásvaldsdóttur sem ásamt öflugu starfsfólki Mosfellsbæjar sá til þess að áætlanir stóðust. Umfjöllun um ársreikning er eðli máls samkvæmt endurlit til liðins tíma. Við horfum í baksýnisspegilinn sem er óvenjulegt því í þessu starfi erum við oftast að horfa til framtíðar. Og framtíðin er björt í Mosfellsbæ. Meirihluti Framsóknar, Viðreisnar og Samfylkingar mun halda áfram að vinna að þeim markmiðum sem sett voru fram í málefnasamningi flokkanna við upphaf kjörtímabils sem og að íbúar bæjarins verði áfram ánægðir með bæinn sinn og þjónustuna sem veitt er í þágu þeirra. Við höldum ótrauð áfram að tryggja góðan rekstur og vandaðar ákvarðanir. Að vanda til verka í undirbúningi ákvarðana og forgangsröðun verkefna verður áfram okkar leiðarljós.

Halla Karen Kristjánsdóttir bæjarfulltrúi, oddviti Framsóknar í Mosfellsbæ.

Anna Sigríður Guðnadóttir bæjarfulltrúi, oddviti Samfylkingar í Mosfellsbæ.

Lovísa Jónsdóttir bæjarfulltrúi, oddviti Viðreisnar í Mosfellsbæ.