Níðings­verk

Dóttir mín er fíkill. Og á morgun ætla Félagsbústaðir að láta fleygja henni út á götu. Ástæðan mun vera húsaleiguskuld. Mér skilst að upp á síðkastið hafi hún hreinlega neitað að greiða leiguna. Ég get raunar vel skilið það: Bríetartún 20 getur ekki kallast mannabústaður.

Íbúarnir í þessum stigagangi búa við stöðugan ótta og öryggisleysi. Á sínum tíma komu Félagsbústaðir upp öryggismyndavélum í stigaganginum, en einn íbúinn, er löngu búinn að klippa á allar leiðslur sem að þeim liggja. Íbúinn er vel þekkt síbrotakona, sem veður vopnuð um stigaganginn og axarför og aðrar skemmdir eftir hana má sjá hér og hvar, m.a. á hurðinni að íbúð dóttur minnar. Dyrnar eru reyndar svo laskaðar eftir ítrekuð innbrot, að í íbúðin stendur nánast opin.

Frá því að Félagsbústaðir úthlutuðu þessari konu íbúð í húsinu, hefur hún valdið öðrum íbúum stöðugri skelfingu með geðofsa sínum, síendurteknum skemmdarverkum og innbrotum bæði í aðrar íbúðir í húsinu og geymslur í sameign hússins.

Meðal afreka hennar má telja innbrot til dóttur minnar fyrir rúmum tveimur árum. Þá var hún í fylgd með einhverjum karlkyns félögum sínum, sem nauðguðu dóttur minni „í öll göt“ svo notuð séu hennar eigin orð, misþyrmdu henni og skildu við hana svo hart leikna að það leið langur tími, mögulega sólarhringur eða meira, hélt hún sjálf, þangað til hún komst til sæmilegrar meðvitundar.

Hún kærði þennan atburð til lögreglu, eða reyndi það allavega, en ég hef ekki neinar spurnir af því að þeirri kæru hafi verið sinnt. Síbrotakonan hefur auðvitað verið kærð til lögreglu miklu oftar, enda líka verið staðin að ýmsum ójöfnuði, m.a. ítrekað að þjófnaði í verslunum.

Hvorki lögregla né Félagsbústaðir virðast hafa aðhafst nokkurn skapaðan hlut. Ef ástæðan er skortur á sönnunum er það augljós fyrirsláttur. Sannleikurinn er öllu fremur sá að ekkert hefur verið aðhafst til að afla sannana.

Það ætti nefnilega ekki að vera neitt tiltökumál. Fjölmiðlar hafa reyndar almennt ekki sýnt þessu ástandi áhuga, en DV hefur þó birt af því fréttir, þá síðustu nú um helgina. Ástandinu í stigaganginum er ágætlega lýst í þessum tveimur fréttum: DV 4. maí 2025 og DV 17. nóvember 2023. Þar er vísað í viðmælendur sem ættu að geta borið vitni ef lögreglan hefði manndóm til að láta sig þetta einhverju skipta.

Mér þykir ástæða til að fara fram á að nú verði tekið í taumana. Það er ekkert eðlilegt við það, að halda hlífiskildi yfir sökudólginum en refsa fórnarlömbunum. Það er sannkallað níðingsverk.

Ég skora þess vegna hér með á framkvæmdastjóra Félagsbústaða ásamt formanni og framkvæmdastjóra Velferðarráðs Reykjavíkurborgar að stöðva þessa aðgerð án tafar og sjá til þess að bæði Félagsbústaðir og lögregla rannsaki málið ofan í kjölinn.

Í stað þess að fleygja íbúum þessa hryllingshúss út á götu ættu Félagsbústaðir þvert á móti að endurgreiða fórnarlömbunum allnokkur ár aftur í tímann og biðja þá opinberlega afsökunar.

Það er kominn tími til að þessu að linni.

Höfundur er gamalmenni.