Hundrað og fimm­tíu manns unnu að opnuninni

Fríhafnarverslanirnar á flugvellinum ganga nú undir nafninu Ísland Duty Free eftir að þýska fyrirtækið Heinemann, tók við rekstrinum að loknu útboði.

Aðspurður um hverjar séu helstu breytingar sem viðskiptavinir gætu orðið varir við vegna breytinganna segir Frank Hansen, framkvæmdastjóri Ísland - Duty Free, að nýja vörumerki fyrirtækisins, Ísland - Duty Free, sé nú mjög greinilegt í verslunum, meðal annars á stórum skjám.

„Við höfum einnig endurskoðað vöruúrvalið og gert nokkrar breytingar á skipulagi verslana okkar. Þetta eru þó einungis fyrstu skrefin — formleg opnun árið 2026 mun marka algjöra umbreytingu. Öll verslunarsvæði okkar verða endurhönnuð með það að markmiði að skapa einstaka verslunarupplifun fyrir viðskiptavini okkar. Lögð verður sérstök áhersla á íslenskar vörur og Ísland, ásamt vel þekktum alþjóðlegum vörumerkjum,“ segir Hansen í skriflegu svari til fréttastofu.

Má búast við breytingum á vöruverði, til hækkunar eða lækkunar?

„Við munum leggja áherslu á að bjóða viðskiptavinum okkar spennandi tilboð, sanngjarnt verð og framúrskarandi þjónustu og upplifun. Auk þess munum við auka úrvalið af þekktum vörumerkjum í ýmsum vöruflokkum. Tilboðin okkar verða bæði tengd einstökum vörumerkjum og líka árstíðarbundin. Við erum sannfærð um að viðskiptavinir okkar muni ekki verða fyrir vonbrigðum,“ segir Hansen.

30 prósent vara verði íslenskar

Hansen segir ennfremur að boðið verði upp á mjög aukið úrval af spennandi vörumerkjum. „Undir merkjunum „Nýtt á Íslandi“ og „Nýtt í Keflavík“ munum við kynna sérvalin alþjóðleg vörumerki. En samhliða því þá munum við leggja mikla áherslu á íslensk vörumerki en 30 prósent af öllum vörum í okkar verslunum verða íslenskar.“

Fyrri rekstraraðili hélt úti heimsíðu þar sem hægt var að nálgast upplýsingar um vöruverð og úrval og nota svokallaða tollkvótareiknivél. Verður sambærileg þjónusta í boði hjá nýjum rekstaraðila þegar fram líða stundir?

„Núverandi vefsíða okkar er í raun aðeins lendingarsíða með helstu upplýsingum um verslanir okkar, en í haust munum við opna nýja og fullbúna vefsíðu með ítarlegum upplýsingum um vörur, verð og vörumerki. Við munum einnig kynna „panta og sækja“ lausn sem gerir viðskiptavinum kleift að versla á netinu og sækja vörurnar í verslanir okkar. Á síðunni verður jafnframt að finna upplýsingar um tollareglur, og við erum að kanna möguleikann á að innleiða reiknivél svipaða þeirri sem þú nefndir — allt verður þetta kynnt í haust. Þangað til hvet ég alla til að skrá sig á vefsíðunni okkar til að fylgjast með fréttum og verða meðal þeirra fyrstu sem fá að vita af opnun nýju vefsvæðisins,“ segir Hansen.

Hefur lýst áhyggjum af stöðunni

Breytingar á rekstri fríhafnarverslana hafa verið nokkuð til umræðu að undanförnu og hefur Félag atvinnurekenda til að mynda lýst áhyggjum af því að nýr rekstraraðili hafi krafið framleiðendur um að lækka vöruverð. 

Framkvæmdastjóri FA hefur sagt íslenska ríkið hafa með þessu framselt Heinemann einokunarstöðu á Keflavíkurflugvelli.