Út­burður manns úr Bríetartúni dreginn til baka

Íbúi í húsinu sagði einu ástæðuna hugsanlega vera þá að maðurinn hafi einhvern tíma haldið tvo smáhunda sem voru líf hans og yndi.

„Þetta er friðsamur maður. En það er akkúrat núna verið að bera hann út. Úthýst. Sonur hans var ekki látinn vita af þessu en konan sem þið hafið verið að skrifa um, hún er hér enn í góðu yfirlæti,“ segir ónefndur íbúi hússins. Honum er um og ó.

Spurður hvort maðurinn skuldi leigu, hvort sú geti verið ástæðan segir íbúinn það ekki svo heldur hljóti þessi útburður að tengjast hundahaldinu.

„Hann hefur ekki verið með hunda hér í hálft ár. Þetta er viðbjóðsleg valdníðsla. Konan sem öllum óróanum veldur er hér hins vegar enn. Hún hefur verið að ræna manninn reglulega og meira að segja þessum hundum.“

Vísir setti sig í samband við Félagsbústaði, sem á stigaganginn allan en Félagsbústaðir sjá um að úthluta og halda utan um félagslegt húsnæði Reykjavíkurborgar. Þar liggja fyrir útistandandi skilaboð og verður fréttin uppfærð um leið og svör berast. Ljóst er að þar gengur mikið á.

...

Málið leystist farsællega

Uppfært 13:15

Vísir ræddi við Falasteen sem er sviðstjóri þjónustu og upplýsingasviðs. Hún sagðist ekki geta tjáð sig um einstaka mál en gat þó tjáð Vísi að þetta tiltekna mál hafi á endanum leyst farsællega. Og henni finnst ekki við hæfi að kalla húsið „hryllingshús“.

„Við leitumst alltaf við að tryggja húsnæðisöryggi allra. Mér finnst ljótt að kalla húsið hryllingshús, þetta lítur rosalega vel út. Ég var þarna í morgun ásamt lögreglu og sýslumanni. Við erum að gera þetta upp svo að fólki líði vel þarna og viljum tryggja öryggi allra.“

Þá sagði hún að í lengstu lög væri reynt að komast hjá því að rifta leigusamningi. Og þegar forsenda fyrir útburði er ekki lengur til staðar er það gert.

„Þetta mál sem þú ert væntanlega að vísa í er að leysast farsællega. Við höfum verið að vinna í þessu á fullu.“

Falasteen gat ekki talað neitt um mál konunnar sem í húsinu er og hefur valdið talsverðu ónæði, né heldur, vegna áðurnefnds trúnaðar um einstök mál, né hvort gripið hafi verið til útburðar vegna hundahalds mannsins.

„Ég ítreka, þetta leystist farsællega.“

Í ljósi nýfenginna upplýsinga hefur fyrirsögn fréttarinnar verið breytt.