Goð­sagnir senda Aroni kveðjur: „Einn besti leik­maður allra tíma“

Aron var um árabil einn besti handboltamaður heims og hefur rakað inn titlum hvar sem hann hefur stigið niður fæti á sínum ferli. Hvort sem það var í Þýskalandi, Ungverjalandi, Spáni, Danmörku eða heima á Íslandi. Alls hefur hann unnið þrjátíu stóra titla með sínum félagsliðum (FH, Kiel, Veszprém, Barcelona og Aalborg) og gæti bætt enn einum í safnið áður en skórnir fara á hilluna.

Aron tilkynnti ákvörðunina á Instagram í gærkvöldi og þakkaði „öllu því góða fólki“ sem hann hefur kynnst á ferlinum. Fólkið þakkar Aroni einnig kærlega.

„Goðsögn“ segir hinn króatíski Domagoj Duvnjak, handboltagoðsögn sem varð á sínum tíma dýrasti leikmaður sögunnar og lauk landsliðsferlinum með eftirminnilegum hætti á EM í janúar, undir stjórn Dags Sigurðssonar. Þeir Aron unnu þýsku deildina sem liðsfélagar hjá Kiel.

Marko Vujin tók í sama streng og lýsti Aroni sem goðsögn. Þeir spiluðu einnig saman hjá Kiel, sem keypti Marko dýrum dómum árið 2010 eftir að hann hafði endað tímabilið sem markahæsti leikmaður Meistaradeildarinnar.

„BESTU kveðjur Aron! Einn besti leikmaður allra tíma“ segir hinn spænski Víctor Tomás, fyrrum fyrirliði Barcelona sem var innvígður í frægðarhöll evrópska handboltans árið 2023. Hann spilaði með Börsungum allan sinn feril og var liðsfélagi Arons frá 2017-21. Þeir unnu spænsku tvennuna öll tímabilin og Meistaradeildina á síðasta tímabil Arons, áður en hann fór til Aalborg.

„Kóngur“ segir hinn danski Henrik Møllgaard, sem er með mölbrotið hjarta. Henrik er einnig nýhættur en hefur unnið fjölda verðlauna með danska landsliðinu, og spilaði með Aroni í Aalborg. Þeir unnu danska bikarinn saman 2021, ofurbikarinn sama ár og árið eftir.

Fjöldi fleiri leikmanna, þjálfara og annarra velunnara sendu Aroni kveðju og lýstu tilfinningum sínum með lyndistáknum (e. emoji).

Þrjú rauð hjörtu bárust til dæmis frá Guðjóni Val Sigurðssyni. Þeir spiluðu lengi saman í landsliðinu og unnu til silfurverðlauna á Ólympíuleikunum í Beijing 2008 og bronsverðlauna á heimsmeistaramótinu 2010 í Austurríki. Eftir stjörnuframmistöðu á EM 2012 var Guðjón keyptur af Kiel og spilaði með Aroni þar næstu tvö tímabil.

Danski landsliðsmaðurinn Lasse Andersson lýsti Aroni með lyndistákni geitar og kórónu. Lasse er einn af fáum liðsfélögum Arons á ferlinum sem gat skotið fastar en hann. Lasse skaut 140 kílómetra hröðu skoti á úrslitahelgi Meistaradeildarinnar árið 2019, þegar hann var liðsfélagi Arons hjá Barcelona. Aron skaut sínu fastasta skoti á ferlinum sömu helgi, á 132 kílómetra hraða.

Bjarki fær nýjan herbergisfélaga

„Liðsfélagi, fyrirliði, herbergisfélagi, brósi!“ segir landsliðsmaðurinn og liðsfélagi Arons hjá Veszprém, Bjarki Már Elísson, og þakkar Aroni fyrir þjónustuna.

Bróðurleg ást

Björgvin Páll Gústavsson, markvörður sem fylgdi Aroni allan landsliðsferilinn, þakkar honum fyrir allt og sendir ástarkveðju.