Walker í vand­ræðum og verður ekki á­fram hjá City

Þjálfarinn Pep Guardiola mun ekki hafa Walker í leikmannahópnum sem fer á HM félagsliða í júní og talið er að Manchester City vilja losa sig við hann í sumar, ásamt Kalvin Phillips sem hefur verið á láni hjá Ipswich.

Walker var lykilleikmaður í liði City frá 2017 en lék sinn síðasta leik gegn West Ham 4. janúar og lét í kjölfarið vita að hann vildi fara frá félaginu. Pep Guardiola, stjóri Manchester City, virtist alls ekki ánægður með þá niðurstöðu.

Vonast var til að AC Milan myndi festa kaup að lokinni lánsdvöl Walker og kaupverðið var haft heldur lágt, aðeins um fjórar milljónir punda. En AC Milan vildi ekki halda honum. Hinn 35 ára gamli Walker fór vel af stað í Mílanó en hefur verið að glíma við meiðsli og spilaði í heildina aðeins ellefu leiki.

Félagaskiptasérfræðingurinn Fabrizio Romano greindi frá því í gærkvöldi að Walker væri á förum frá City í sumar og önnur félög væru farin að sýna honum áhuga.

Slúðurblöð í Bretlandi segja Walker einnig vera í vondum málum í einkalífinu. Eiginkona hans, Annie Kilner, sé ekki búin að fyrirgefa honum framhjáhald. Walker hafi vonast til að Ítalíudvölin myndi veita þeim nýtt upphaf, en hún tali varla við hann lengur.