Sancho samdi ekki við Chelsea sem þarf að borga sekt

Chelsea fékk Sancho að láni á síðasta tímabili og samþykki að kaupa leikmanninn fyrir um 25 milljónir punda ef liðið myndi enda ofar en í fjórtánda sæti, sem það og gerði.

Samkomulag náðist hins vegar ekki við Sancho um launakjör en hann er einn launahæsti leikmaður ensku úrvalsdeildarinnar með 300 þúsund pund á viku hjá United.

Chelsea borgaði helming þeirra launa meðan lánstímanum stóð og stefndi á að lækka Sancho í launum ef hann hefði samið um að vera áfram. Viðræðurnar sigldu hins vegar í strand og Chelsea mun þurfa að greiða United fimm milljónir punda fyrir að standa ekki við kaupsamkomulagið.

Sancho mun snúa aftur til United þegar lánssamningurinn rennur út í lok mánaðar. Samningur hans gildir út næsta tímabil en talið er að United vilji losa hann frá félaginu í sumar, fjórum árum eftir að hafa keypt hann frá Borussia Dortmund fyrir 73 milljónir punda. United skuldar Dortmund enn 17 milljónir punda fyrir Sancho.