Fótbolti

„Þær gerðu vel á móti vindi“

Ágúst Orri Arnarson skrifar
Sveindís Jane var í framherjastöðunni en komst lítið á boltann í seinni hálfleik.
Sveindís Jane var í framherjastöðunni en komst lítið á boltann í seinni hálfleik. vísir / anton brink

Sveindís Jane Jónsdóttir segir Ísland hafa lítið getað gert í mótvindi en hrósaði Frökkunum fyrir þeirra frammistöðu á móti vindinum. 2-0 tapið þótti henni leiðinlegt, en skipti á endanum ekki miklu máli.

„Varla mikið hægt að gera, ótrúlega mikill vindur og ég held að það hafi sést á báðum liðum. Var mjög erfitt að spila í dag, 2-0 leiðinlegt tap, en svo hefði það ekki skipt miklu máli ef við hefðum unnið því að Noregur vann“ sagði Sveindís um klukkutíma eftir leik.

Ísland var með vindinn í bakið í fyrri hálfleik og hefði þurft að nýta meðvindinn betur.

„Hundrað prósent. Þær gerðu vel á móti vindi. Við hefðum kannski getað verið aðeins rólegri á boltanum og spilað honum betur. Vorum svolítið mikið að setja hann langan og vindurinn tók hann bara. Við vildum byrja á móti vindi en fengum það ekki, þannig að við hefðum kannski getað nýtt okkur aðeins betur að vera með vindinn.“

Sveindís fékk fínt færi í fyrri hálfleik en skot hennar var varið.vísir / anton brink

Í seinni hálfleik komst Ísland síðan varla upp af eigin vallarhelmingi og fékk á sig tvö mörk.

„Þetta var bara ótrúlega erfitt. Gátum voða lítið gert, boltinn bara fauk ef við reyndum að hreinsa þannig að við vorum bara á okkar vallarhelmingi allan seinni hálfleik. Áttum ekki mörg færi.“

Hvernig fannst þér þín frammistaða?

„Fín í fyrri hálfleik, gerði það sem ég gat gert. Í seinni hálfleik var bara ekkert að gerast. Þurfti bara að hlaupa án bolta eða á eftir boltanum. Voða lítið sem ég gat gert“ sagði Sveindís.




Fleiri fréttir

Sjá meira


×