Enski boltinn

Liverpool hafnaði til­boði Barcelona

Ágúst Orri Arnarson skrifar
Luis Diaz er mikilvægur hluti af leikmannahópi Englandsmeistara Liverpool.
Luis Diaz er mikilvægur hluti af leikmannahópi Englandsmeistara Liverpool. Liverpool FC/Liverpool FC via Getty Images

Liverpool er sagt hafa hafnað tilboði Barcelona í Luis Diaz og gert spænsku meisturunum grein fyrir því að hann sé ekki til sölu. Kólumbíski kantmaðurinn sé mikilvægur hluti af plönum þjálfarans Arne Slot fyrir næsta tímabil.

Diaz hefur ekki skrifað undir nýjan samning síðan hann kom fyrst til Liverpool árið 2022 og því verið orðaður við brottför frá félaginu, en samningur hans gildir þó næstu tvö tímabil til 2027. 

Diaz hefur ekki sjálfur gefið í skyn að hann sé ósáttur eða vilji fara, aðallega hafa slúðurblöðin bara verið að orða hann við brottför.

Nú greinir David Ornstein hjá The Athletic hins vegar frá því að Barcelona hafi lagt fram tilboð í leikmanninn, ekki kemur fram hversu hátt það hljóðaði en Liverpool ku hafa sagt skýrt nei. 

Diaz sé á besta aldri 28 ára gamall og mikilvægur hluti af leikmannahópnum. Liverpool vilji frekar nýta hans krafta og láta samninginn renna út en að selja hann.

Þá hafi Richard Hughes og Michael Edwards, yfirmenn hjá Liverpool, gert tilraunir til að semja við Diaz en viðræður hafi ekki borið árangur.




Fleiri fréttir

Sjá meira


×