Sly Stone er látinn

Fjölskylda Stone staðfesti andlátið í yfirlýsingu í gær, en hann hafði meðal annars glímt við lungnasjúkdóm um nokkurt skeið.

„Sly var stórbrotin persóna, einstakur brautryðjandi og sannur frumkvöðull sem endurskilgreindi landslag popp-, fönk- og rokktónlistar,“ sagði í yfirlýsingunni. Kom fram að einstök lög hafi óneitanlega haft mikil áhrif á heiminn.

Stone byrjaði tónlistarferilinn sem plötusnúður í San Francisco en sló svo í gegn á sjöunda og áttunda áratugnum.

Sly Stone hét Sylvester Stewart réttu nafni og söng gospeltónlist með systkinum sínum sem barn. Hann átti síðar eftir að stofna sveitina Sly and the Family Stone, en meðal liðsmanna sveitarinnar voru bræður Sly. Sveitin spilaði upphaflega gospeltónlist en fór síðar að spila fönk.

Eitt vinsælasta lag sveitarinnar var Dance to the Music frá árinu 1967, en tveimur árum síðar var sveitin í hópi þeirra sem tróð upp á hinni goðsagnakenndu Woodstock-tónlistarhátíð.

Áttundi áratugurinn einkenndist af innbyrðis deilum liðsmanna sveitarinnar og hélt Sly Stone áfram að koma fram einn síns liðs.

Sly and the Family Stone var tekin inn í Frægðarhöll rokksins árið 1993.