Eltir draumana og þarf að færa fórnir

Ágúst Þór er 25 ára gamall og hefur komið víða við í tónlistinni, þar á meðal með hljómsveitinni Stuðlabandinu og sem þátttakandi í Söngvakeppninni fyrr á árinu. Hann er sömuleiðis farinn að gefa út tónlist undir eigin nafni og er margt spennandi á döfinni hjá honum.

Hér má hlusta á lagið:

Rétt náði fluginu

Ágúst Þór er sömuleiðis faðir og sýnir persónulegar hliðar í þessu nýja lagi.

„Á leiðinni fjallar svolítið um mitt líf síðastliðna mánuði. Ég hef verið mikið á flakkinu á milli landshluta og einhvern veginn er ég alltaf á leiðinni eitthvert. 

Sömuleiðis sæki ég innblástur í tilfinningu sem margir þekkja, að vera að elta draumana sína og þurfa í staðinn að fórna einhverju eða missa af. Þú ert að leggja svo hart að þér en værir alveg til í að geta á sama tíma verið heima með fjölskyldu og vinum.“

Hugmyndin kom til hans á svolítið krefjandi stundu.

„Lagið var í raun samið daginn fyrir þriggja ára afmæli sonar míns. Það leit allt út fyrir að ég myndi missa af því sökum óveðurs. 

Öll flug lágu niðri, ég var í bænum að spila og virtist ekki vera að fara að komast heim í afmælið hjá stráknum mínum. 

Sem betur fer náði ég síðasta fluginu áður en óveðrið skall á og ég komst heim í tæka tíð.“

Textinn flæddi upp úr honum

Hann segir það gjarnan einkennandi fyrir Íslendinga að vera stöðugt á þeytingi.

„Við erum svo oft að flýta okkur og í kappi við tímann eða næstu verkefni. Ég get svo sannarlega tengt við það að reyna halda mörgum boltum á lofti og því kom textinn að þessu lagi bara flæðandi upp úr mér.“

Á leiðinni er þriðja lagið sem Ágúst gefur út á þessu ári.

„Lagið er samið af sjálfum mér og Hákoni Guðna Hjartarsyni. Við fengum svo meistara Halldór Gunnar Fjallabróðir til að spila á gítar inn á lagið. Lagið er mixað af Sæþóri Kristjánssyni og Ben Pramuk masteraði.“

Það eru spennandi verkefni framundan hjá þessum tónlistarmanni.

„Ég er að gefa út annað lag í næstu viku með Jóni Jónssyni fyrir Norðurálsmótið í knattspyrnu en lagið er samið af Jóni Jónssyni og flutt af mér. 

Það verður frumflutt á Akranesi þann 21. júní á setningarhátíð Norðurálsmótsins og kemur út á föstudaginn,“ segir Ágúst að lokum en hér má hlusta á hann á streymisveitunni Spotify.