„Ég valdi bara bestu gelluna, hún gæti reyndar verið mamma mín“

Erika er aðeins átján ára gömul en hefur unnið IceBox sjö sinnum áður og síðast í fyrra. Viðburðurinn í ár verður stærri en nokkru sinni fyrr og hún hefur undirbúið sig vel undanfarna mánuði með heimsklassa þjálfurum erlendis og tekið æfingabardaga gegn öflugum andstæðingum.

„Til dæmis með heimsmeistara, silfur í heimsmeistaramóti, gull á Evrópumeistaramóti, æfði bara með bestu stelpum í heiminum. Ég var rosalega heppin að fá allt þetta“ sagði Erika í viðtali sem má sjá í spilaranum að ofan. 

Erika berst á föstudagskvöldið við mjög reynslumikinn andstæðing, Nora Guslander frá Svíþjóð, sem á að baki yfir hundrað bardaga og er um fertugt, hæglega nógu gömul til að vera móðir Eriku.

„Mig langaði að sýna hvað ég get þannig að ég valdi bara bestu gelluna sem ég gat fundið … Hún gæti reyndar verið mamma mín en ég horfi bara á það sem plús sko, ég gæti alveg buffað mömmu mína þannig að ég ætti að geta buffað hana, ef maður hugsar þetta þannig. Mér finnst þetta bara gaman“

Þegar að IceBox kemur býr Erika hins vegar yfir meiri reynslu en nokkur annar boxari, hún hefur unnið viðburðinn oftast allra og segir ekkert skemmtilegra.

„Það er ekkert eins og IceBox í heiminum, svo sjúkt að við erum með þetta hérna á Íslandi. Stemningin alltaf geggjuð, ég get ekki beðið eftir að sjá alla strákana með skiltin fyrir mig, mér finnst það geggjað. Ég fékk gæja til að lita Erika Night í hárið sitt, þetta er bara geggjað, það eru allir ógeðslega stemmdir heyrist mér sko.“

Skemmtikrafturinn hleypur ekki í hringi

Gegn mun eldri andstæðingi mætti ætla að hin unga og orkumikla Erika hlaupi hringi í kringum þá sænsku til að þreyta hana.

„Að hlaupa í kringum hana getur verið sniðugt en svo er ég auðvitað performer. Mér finnst ekkert skemmtilegt þegar box er bara einhver að hlaupa og hlaupa og gellan eitthvað að elta hana allan tímann.

Ég er boxari, ég er komin til að berjast og mig langar að hafa skemmtilegan bardaga. Margir halda að það sé svo sniðugt að hlaupa en það er líka sniðugt að bara traðka yfir hana, labba á hana og taka hana út þannig“ sagði hin skemmtilega kokhrausta Erika Nótt.

IceBox fer fram í Kapakrika á föstudagskvöld og verður í beinni útsendingu á Sýn Sport frá klukkan hálf átta. Bardagi Eriku Nóttar og Laven Soufi er fyrstur á sjónvarpsdagskránni sem hefst klukkan 20.20. Upphitunarbardagar hefjast klukkan 19.15 og verða í beinni á Vísi.

Hægt er að kaupa stakan viðburð á myndlyklum Sýnar og Símans. Einnig er hægt að kaupa aðgang að kvöldinu hjá Livey.