Bjössi í Mínus er ný rödd Sýnar

Björn Stefánsson er landsþekktur fyrir leik sinn í sýningum í borgarleikhúsinu á borð við Níu líf, bíómyndum á borð við Á ferð með mömmu og Eurovision Song Contest: The Story of Fire Saga, að trommuleiknum í rokksveitinni Mínus ógleymdum.

„Það er mjög spennandi að takast á við þetta. Mér þykir rosa vænt um þetta batterí. Bara frá því að maður var barn að horfa á Með afa,“ segir Björn en hann ræddi tímamótin í Bítinu á Bylgjunni í morgun.

Hann er meðvitaður um að verkefnið sem honum hefur verið fólgið er ekkert smávægilegt. Hann tekur við röddinni af Björgvini Halldórssyni.

„Það eru skór að fylla, skal ég segja þér. Enda er hann mikill vinur minn,“ segir hann.

Björn segist nálgast þetta eins og hvert annað hlutverk. Hann beiti einni rödd þegar hann les íþróttapistla, annarri í símsvaranum og enn annarri við dagskrártilkynningar.

Hann segir það hafa komið sér á óvart hvað gert væri ráð fyrir langri röð í þjónustuverinu.

„Mér óraði ekki fyrir því að ég þyrfti að lesa Þú ert númer 99 í röðinni. Ef þú ert númer 99 í röðinni þá átt þú bara að vera að gera eitthvað annað,“ segir Björn Stefánsson leikari.

Vísir er í eigu Sýnar.