Keyptu Björg­ólf strax út úr Heimum

Í tilkynningu Heima til Kauphallar segir að kaupin á Grósku og Gróðurhúsinu ehf., sem tilkynnt var um þann 23. apríl síðastliðinn séu nú frágengin. Upphaflega var gengið frá samkomulagi um kaupin í febrúar þessa árs.

Gróska eigi fasteignina Grósku að Bjargargötu 1, 102 Reykjavík, samfélag nýsköpunar og eina stærstu og metnaðarfyllstu skrifstofubyggingu landsins. Fasteignin sé um 18.600 fermetrar að stærð ásamt 6.200 fermetra bílakjallara með 205 stæðum, eða samtals um 24.800 fermetrar. Gróðurhúsið reki sprotasetur og vinnurými í fasteigninni. Eignin sé BREEAM vottuð en við kaupin hækki hlutfall vottaðra eigna Heima úr 38,9 prósentum í 41,1 prósent.

Meðal leigutaka í Grósku séu leikjaframleiðandinn CCP, bandaríska hugbúnaðarfyrirtækið NetApp, Vísindagarðar Háskóla Íslands, World Class, Íslandsstofa og fjölmörg önnur fyrirtæki sem séu í fararbroddi íslenskrar nýsköpunar. Samsetning leigutaka stuðli að fjölbreyttu mannlífi í húsinu, sem rími vel við einkennisorð Heima um að „lifa, leika, starfa“.

Fær um þrjá milljarða

Kaupverðið hafi verið greitt, eins og áður hafi verið tilkynnt um, með útgáfu og afhendingu 258 milljón nýrra hluta í Heimum. Hlutirnir hafi verið teknir til viðskipta hjá Nasdaq og afhentir seljendum Grósku og Gróðurhússins.

Sem liður í viðskiptunum muni fjárfestingarfélagið Omega ehf. kaupa hlut Björgólfs Thors Björgólfssonar og verði eftir kaupin stærsti hluthafi Heima með liðlega 12,5 prósenta hlut.

Markaðsvirði 12,5 prósenta hlutar í heimum er um 9,3 milljarðar króna. Björgólfur átti þriðjung í Grósku á móti þeim Andra og Birgi Má og því má áætla að hann hafi fengið um 3,1 milljarð króna fyrir hlut sinn í Heimum.

Einstök bygging

Í tilkynningu er haft eftir Halldóri Benjamín Þorbergssyni, forstjóra Heima, að Gróska sé einstök bygging sem státi af öflugu samfélagi nýsköpunar og skapandi greina og sómi sér afar vel í eignasafni Heima.

„Staðsetningin á Háskólasvæðinu, stærð og hönnun hússins, auk nálægðar við miðborgina, mun að okkar mati styðja við stöðuga eftirspurn leigutaka eftir skrifstofum og öðru atvinnuhúsnæði í Grósku til langrar framtíðar. Við höfum á undanförnum misserum selt stakar eignir úr eignasafni Heima í samræmi við stefnu okkar um að eiga og reka sterka kjarna með fjölbreytta þjónustu í grennd við íbúðabyggð og góðar samgöngutengingar. Kaupin á Grósku og Gróðurhúsinu eru mikilvægt skref á þeirri vegferð og styrkja bæði félagið og eignasafn okkar.“

Framtíðin sé björt

Þá er haft eftir Birgi Má að salan á Grósku til Heima sé ánægjuleg og marki tímamót í nærri tíu ára langri sögu uppbyggingar hugmyndaseturs í Vatnsmýrinni. Sú saga hafi hafist þegar þeir viðskiptafélagarnir hefðu, sem stærstu eigendur CCP og í samstarfi við forstjóra félagsins, viljað byggja höfuðstöðvar sem hæfðu starfsemi þess. Í samstarfi við CCP og Reykjavíkurborg hafi þeir valið þessa staðsetningu, ekki síst vegna tenginga við vísindasamfélagið og háskólann.  

„Eftir að hafa unnið víða um heim og fjárfest í nýsköpun um langt skeið vaknaði sú hugmynd snemma að byggja upp þekkingarklasa sem myndi jafnast á við það besta sem þekkist á „campus-um“ tæknifyrirtækja erlendis.  Það hefur svo sannarlega tekist. Fyrir okkur sem komum að uppbyggingu hússins fylgir því líka mikil ánægja og stolt hversu mörg fyrirtæki sem náð hafa stórkostlegum árangri hafa stigið sín fyrstu skref í Grósku. Þetta sýnir að ætlunarverkið tókst, að húsið yrði gróðrarstöð skapandi iðnaðar og verðmætasköpunar á grundvelli hugvits á íslandi. Svona metnaðarfullt hús verðskuldar öflugan eiganda sem hefur burði til að halda þróuninni áfram. Heimar eru öflugasta fasteignafélag landsins með flotta framtíðarsýn og í mínum huga rétti aðilinn til að taka við rekstri Grósku. Framtíðin er björt.“