Flaug í einkaflugi með Støre

Þetta kemur fram í skriflegu svari forsætisráðuneytisins við fyrirspurn fréttastofu, þar sem sundurliðaðar eru allar opinberar ferðir hennar, hve langar þær voru og með hvaða flugfélagi var flogið.

Fundir óvenjutíðir

Athygli vekur að hluta leiða sinna til og frá Kænugarði á minningarathöfn vegna stríðsins í Úkraínu flaug Kristrún í einkaflugi með Jonas Gahr Støre forsætisráðherra Noregs. Saman flugu þau frá Ósló til Póllands og til baka í einkaflugi. Ferðast var með lest milli Póllands og Kænugarðs. 

Samkvæmt svari ráðuneytisins hefur Kristrún oftast flogið með Icelandair í opinberum ferðum sínum, eða í átta flugferðum af 22. Þá hefur hún einu sinni flogið með Play, í þrígang með SAS, tvígang með KLM og einu sinni með öðrum evrópskum flugfélögum. 

Fundir forsætisráðherra á alþjóðavettvangi hafa verið óvenjutíðir undanfarna mánuði þar sem miklar vendingar hafa orðið í alþjóðamálum, sér í lagi í tengslum við stríð og varnarmál. Allar ferðir Kristrúnar voru einnar til fjögurra nátta. 

Sótti Færeyjar heim í þrjá daga

Fyrsta ferð Kristrúnar í embætti var um miðjan febrúar á öryggismálaráðstefnu í München. Síðar í þeim mánuði sótti hún áðurnefndan fund í Kænugarði og sótti í leið fund SAMAK – samráðsnefndar jafnaðarflokka og alþýðusambanda á Norðurlöndum, og fund með sendiherrum Norðurlanda gagnvart Íslandi í Ósló. 

Í lok mars fór Kristrún til Parísar á leiðtogafund um málefni Úkraínu og í byrjun apríl sótti hún fundi með forseta framkvæmdastjórnar ESB og forseta leiðtogaráðs ESB Í Brussel. 

Í byrjun maí fór Kristrún á leiðtogafund JEF-ríkjanna í Ósló og hélt síðan í þriggja daga opinbera vinnuheimsókn til Færeyja. 

Þá sótti hún leiðtogafund EPC í Tirana í Albaníu um miðjan maí. Í lok maí sló Kristrún þrjár flugur í einu höggi og sótti sumarfund forsætisráðherra Norðurlandanna í Turku í Finnlandi, fund með forsætisráðherra Hollands í Haag og fund með framkvæmdastjóra NATO í Brussel.